KUCHING: Urung 3,000 iku penerima Bantu Diguna Pemun Sarawak (SKAS) ba Sitak Kunsil Nengeri (DUN) Satok.
Kaban Kunsil Nengeri (ADUN) Satok, Datuk Ibrahim Baki madah, sida enggau naka ulih nentuka semua penerima SKAS tu enda tinggal nerima bantu nya.
“Nya alai, kami nyendiaka kaunter ba Balai Gerempung Anak Seni Bandarshah enggau Kompleks Lumba Satok sehari tu enggau pagila dikena mantu sida.
“Aku ngarapka kaunter tu ulih mantu sida ti deka ngaga peminta SKAS kelebih agi mantu bala orang tuai enggau rayat di Satok,” ku iya.
Ibrahim bejaku munyi nya rambau ditanya pemberita maya ngabas Kaunter SKAS ba Balai Gerempung Anak Seni Bandarshah enggau Kompleks Lumba Satok ditu, pagi tadi.
Ku iya, sekeda rikod peranak ba genturung Satok ti bulih bantu nya bisi udah ditemu sida.
“Sekeda rikod ti madahka sida bisi bulih bantu nya, dikangau kami sida datai kitu ngambika bantu nya ulih dikena sida ila.
“Aku ngaga kangau telefon ngagai sida ngasuh datai ke kaunter tu awakka proses baka ngaga SarawakID enggau SPay Global ulih digaga ke sida.
“Baka ti ditemu semua bantu tu bisi tiga kategori iya nya RM800, RM400 enggau RM250, tu bantu dikena ngelempung tating belanja sida meli barang ti diguna,” ku iya.
Iya madah, nyema bisi peminta kaunter SKAS nya ila deka dibuka ba genturung pendiau bukai ngambika ulih mantu rayat di DUN Satok meruan.
“Kaunter SKAS tu dibuka dua hari, belabuh pukul 8 pagi ngagai pukul 4.30 lemai.
“Udah tu ila, kami engka deka muka kaunter ba Segedup enggau Sungai Maong ngambika ukih mantu peranak ba genturung din laban aku andalka semua 3,000 iku penerima nya nadai tinggal,” ku iya.
