KUCHING: BorneoCraft Global 2.0 deka diatur berengkah ari 25 ngagai 29 November tu di Tebing Ai Kuching ngena rambai jaku “Crafting Tradition and Innovation”.
Sapit Menteri Dagang, Industri Kreatif enggau Seni Pemerindang Sarawak ke mega Chairman Komiti Pengatur BCG 2.0, Datuk Snowdan Lawan madah, sepenyampau 200 orang dagang kraf deka ngambi bagi, datai ari 30 orang dagang menua luar, 30 ari nengeri bukai di Malaysia enggau 140 ari Sarawak.
“Kami naga 30,000 pengusung sepanjai lima hari program diatur. Bisi 25 pengelicha antarabansa deka ngulu Simposium Antarabansa kena 25 enggau 26 November di Hotel Riverside Majestic.
“Sida deka mantaika semilan sesyen ngenang mayuh pekara, ari pesaka enggau teknik kraf ngagai makit, pelajar enggau dagang temuai,” ku iya.
Snowdan nyebut pekara nya ba aum media BorneoCraft Global 2.0 ditu kemari lalu sama datai Sekretari Mendam opis menteri nya, Morshidi Fredrick. Iya madah baru, BCG 2.0 bela meri awak ngagai pemekuh kraf ngulihka penemu, peneleba enggau akses makit, kelimpah ngentapka penuduk Sarawak dalam sektor dagang temuai enggau industri kreatif di renggat global.
“BCG 2.0 meri utai ke diguna pemekuh kraf kitai, iya nya penemu, peneleba enggau akses ngagai makit. Tu mega ngentapka penuduk Satawak ba kar dagang temuai enggau industri kreatif dunya.”
Iya mega madah, pengusung bisi peluang meda demonstrasi kraf ba dia, ngulu kelas master ari raban artis antarabansa sereta beperindang enggau main asal sereta muzik ninting hari di The Ruai Stage.
Kelimpah ari nya, Premium Sarawak Pavilion deka mantaika bemacha kraf Sarawak nyengkaum pua kumbu, songket, keringkam, asil manik, anyam bakul enggau seramik. BCG 2.0 bela ngatur Pengerami Makai Lemai Gala enggau Anugerah Kraf Antarabansa kena 27 November sereta Simposium Antarabansa kena 25 enggau 26 November.- EDISI UKAS
