KUCHING: Sepenyampau 303 kes nagih pampas tanah ti diambi udah direjister di Kort Bumiputera Sarawak naka diatu ti ngaul penyampau RM19.2 juta di selampur nengeri.
Sapit Menteri ba Opis Premier Sarawak (Undang-Undang enggau Adat Bumiputera), Datuk Jefferson Jamit Unyat madah, bagi menua Limbang ngerikod kes pemadu tinggi iya nya 80 kes enggau penyampau pampas RM9.3 juta sereta nyadi bagi menua ti ngembuan pampas pemadu besai di Sarawak.
Terang iya, bagi menua bukai baka Sri Aman ngerikod 63 kes (RM1.2 juta), Bintulu ngerikod 30 kes (RM2.8 juta), Kapit bisi 28 kes (RM3 juta) lalu Mukah bisi 28 kes (RM718,000).
“Pia mega, bagi menua Betong ngembuan 24 kes (RM424,000), Sibu ngerikod 17 kes (RM581,000), Kuching bisi 11 kes (RM423,000) lalu Miri bela 11 kes (RM217,000).
“Nya dientudi ke bagi menua Sarikei ngerikod semilan kes (RM69,000), Serian ngerikod siti kes (RM230,000) enggau Samarahan pen bela siti kes (RM153,000).
Jefferson bejaku munyi nya rambau nyaut tanya Kaban Kunsil Nengeri (ADUN) Bukit Semuja, John Ilus rambau Aum Kunsil Nengeri (DUN) Sarawak ditu, kemari.
Iya madah, sepenyampau 157 kes pampas tanah ti beungkus RM12.5 juta mujur diputar enggau dipechara di Kort Bumiputera Sarawak kenyau ari taun 2008 nyentuk Oktober 2025.
“Kes pampas tanah ti apin diputar iya nya bisi 146 kes ti enggau penyampau RM6.7 juta.
“Penyampau tu mungkur kes ti agi ba renggat meresa dokumen, diserenih, verifikasyen penerang pengempu tanah sereta atur pengawa entara ejensi sebedau ulih diputar,” ku iya.
Tampung iya baru, entara pun penyadi kes nya laun diputar ketegal pengawa bechara begunaka sekeda awak, suntuk majistret di Kort Bumiputera Pelilih, penyampau kes ti mayuh enti dibanding bala majistret sereta peminta ngelanjar ari luyar bekaul.
Pekara nya, ku iya, ngujungka langgur mending pechara majak pisit lalu timpuh mutar pen dilanjar lalu nya mih ti ngasuh penyampau kes bedau diputar majak nambah. – EDISI UKAS
