KUCHING: Sarawak ngerikod skala muai uras ti chukup mayuh iya nya ngelui 39,000 tan sehari lalu manggai beratus ribu tan setaun.
Kaban Kunsil Nengeri (ADUN) Opar, Billy Sujang madah, pengirau ati diri lebuh meda statistik ti mandangka peranak mengeri mayuh agi muai uras, seraya peranak menua pesisir jauh kurang nerima servis ngintu uras ti meruan.
“Pekara tu ngayanka undangundang lama enggau chara lama enda efektif agi laban udah enda mujur ngatur penanggul tu.
“Nya alai, udah datai ba maya Sarawak nyingkang ngagai jeman baru ngintu uras enggau pengeraja asal ngena chara meruan,” ku iya.
Billy bejaku munyi nya lebuh bejuraika RUU Ngintu Pengeraja Meruan enggau Teda 2025 ba Aum Kunsil Nengeri (DUN) Sarawak Ke-19 ditu, kemari.
Ku iya, RUU tu meseti nyadi kereban dikena ngemujurka jeman ti ngemeratka efisyen, ekuiti, akauntabiliti enggau inovasyen.
Nya alai iya minta semua tuai di menua tu sama ransing matau pengawa matau uras kelimpah neritka adat ti patut sereta meri kuasa ngagai komuniti mengeri enggau menua pesisir.
Ku iya, enti enda dipejalai, pengawa tu deka ngasuh rebak dudi besalahka pengari rayat ukai bepelasarka undang-undang ti udah dikemendar, tang bepelasarka utai ti enda mujur digaga sida lebuh ngintu rampa menua enggau pengerai rayat.
“RUU nya nyadi pekara ti ditegi ba politik ungkup ekonomi dudi hari, pengelantang nembiak enggau pemanah nama Sarawak.
“Enti nadai pengawa ti berani ba kandang mengeri, ungkus ngatur uras nyengkaum ngumpul, ngangkut enggau muai uras dipelaba deras niki.
“Kelimpah ari nya, menua pesisir deka ngundan pengamah ba rampa menua, risiko penyakit, ampuh bah, pengamah sungai enggau pengerai rayat,” ku iya.
Billy nyemetak madah, RUU nya meri peluang ngagai Sarawak ba penetap ti nyengala, iya nya enda ngemendarka uras malut pengidup rayat tauka ngamah kandang menua enggau genturung pendiau.
Ku iya, enti undang-undang nya dipejalaika enggau tegap sereta disukung perengka guna ti chukup, Sarawak dipechaya ulih nyingkang ke mua nyadi siti nengeri ti meruan, moden sereta lurus ungkup semua
