SYLVESTER RIANG
Suarasarawak.news@gmail.com

KUCHING: Siku nembiak Sekula Sekondari Pengkalan Chepa, Kelantan, Anatalia Andy gaga ati ulih ngemegahka apai indai enggau pengajar pengudah bulih 8A, 1B ba peresa Sijil Pelajaran Malaysia (SPM) 2024.

Tusui iya, lebuh nerima pemutus peresa nya tadi, iya gaga amat ati sereta enda nyangka tau bulih pemutus ti nyulut baka nya.

“Aku enda nyangka tau bulih 8A kelebih agi ba Subjek Matematik laban sebedau tu, aku enda kala bulih A ba subjek tu.

“Puji Tuhan, laban ba peresa SPM tu, aku mujur bulih A ba Subjek Matematik tu.

“Penyulut tu berekat ari pengeransing aku belajar ngelama tu kelimpah ari embing bala pengajar ba sekula enggau pengeran apai indai nganjung aku belajar tuisyen.

“Aku rindu agi belajar kediri muak ke malam lalu siang hari aku bejalaika aktiviti bukai.

“Aku ngarap ulih diterima masuk ba Palan Pematih Pengajar (IPG) laban aku bisi ati deka nyadi pengajar Subjek Sejarah,” ku iya.