KUCHING: Sarawak tegap ngagai empat dokumen beguna baka Sempekat Malaysia 1963 (MA63), Konstitusyen Sarawak, Komiti Cobbold enggau Konstitusyen Perintah Besai dikena terus ngemansang menua tu nuju mengeri maju.
Ku Premier Sarawak Datuk Patinggi Tan Sri Abang Johari Tun Openg, nya nyengkaum ngerumban pemansang ekonomi.
Ku iya, dokumen nya nyadi ‘resipi resia’ dikena nambahka penatai pemisi menua ninting taun.
“Resia ti aku bai kitu nya bup ti pemadu beguna iya nya Sempekat Malaysia 1963 (MA63), Konstitusyen Sarawak, Komiti Cobbold enggau Konstitusyen Perintah Besai.
“Empat iti tu nyadi Bup Kudus aku. Kami ngembuan sekeda chara endur ngulihka kuasa ngiga asil ngagai Sarawak, nya alai, aku netapka Chukai Jual Nengeri (SST) ngagai Petroliam Nasional Berhad (Petronas).
“Petronas tu enda ulih ditegu, tang kitai bisi kuasa (ngena SST), laban nya penatai pemisi ti beguna,” ku iya.
Abang Johari bejaku munyi nya rambau Randau Tujuh Taun Begulai enggau Premier ti diatur ba Bilik Ballroom Satok, Palan Aum Hikmah Exchange ditu, malam tadi.
