MIRI: Premier Sarawak, Datuk Patinggi Tan Sri Abang Johari Tun Openg madahka diri deka deriba kediri nemuai nengah jalai Long Lama ngagai Long Kevok, Baram.

Seraya mantaika pengaga ati diri bekaul projek jalai baru nya ti udah tembu digaga, iya madah, juluk ati nya deka dikeamat pengudah Hari Raya Aidilfitri ila.

“Aku udah dikangau Datuk Amar Douglas Uggah Embas (Sapit Premier Sarawak) nguji deriba nengah jalai alun ari Long Lama…ulih, tang pengudah Hari Raya Aidilfitri ila.

“Aku deka deriba kediri ngena entukar aku empu ngagai Long Kevok dikena ngujika jalai alun ti baru tembu digaga tu,” ku iya.

Abang Johari mansutka jaku nya rambau aum pemberita pengudah nemuai ngabas Kaunsil Palan Penyangkai Kapal Miri ba Piasau, kemari.

Iya madahka diri kala nemuai ngabas komuniti Penan ba Long Kevok tang maya nya bedau bisi jalai alun.