Abang Johari dipebasa bejadi Gawai Dayak Renggat Nengeri

KUCHING: Pengerami Gawai Dayak renggat nengeri deka diatur kena 15 Jun ba sebuah hotel tebilang ditu.

Sapit Kepala Menteri Datuk Amar Douglas Uggah Embas madahka pengerami nya deka dipeyandi Kepala Menteri Datuk Patinggi Abang Johari Tun Openg.

“Tu siti pengerami ninting taun diatur bala komiti pengatur Gawai Dayak renggat menua tu.

“Kami ngangau enggau masa Kepala Menteri bejadika pengerami tu seraya nibarka jaku peransang sereta lalau ngagai raban bansa Dayak ngambika seruran begempung engga ngedutka kaul serakup entara rayat Sarawak ba mayuh macham pekara,” ku iya.

Uggah mansutka jaku nya pengudah ngetuaika penemuai Meri Basa ngagai Abang Johari di opis iya ditu seraya ngemanjaika jaku kangau minta iya bejadika pengerami nya.

Nangkan nya, iya madahka Abang Johari mega dikangau nyadi temuai dipebasa ba sebengkah pengerami Gawai Dayak diatur ketuai raban bansa Dayak Iban Bagi Menua Kuching kena 18 Jun tu.

“Kitai bisi siku Temenggong Iban, siku pemancha, tujuh Penghulu sereta 40 iku Tuai Rumah di pelilih menua Kuching.

“Sida tu deka ngemai mayuh bengkah penanggul sereta penusah ti ditapi bala komuniti ba genturung pendiau sida baka pekara rumah, pelajar, pengawa rama sereta ke bukai,” ku iya.

Sama bisi nyempulang Uggah nemuai Datuk Seri Micheal Manyin, Datuk Seri Dr. Stephen Rundi, Datuk Dr. Jerip Susil enggau Datuk Dr. Penguang Manggil sereta Datuk Alexander Nanta, Datuk Gerawat Jala, Datuk Ik Pahon, Datuk Minar Ranum, Datuk Henry Jinep, Martin Micheal Ben enggau John Ilus.

TANDA BASA… Uggah nyuaka surat kangau Pengerami Gawai Dayak ti diatur 15 Jun tu ngagai Abang Johari rambau penemuai meri basa, ditu kemari.

Suara Sarawak