Adun Semop ngagih belanja dikena ngatur bemacham program

BINTANGOR: Mayuh bengkah gerempung volunteer nerima pemeri dikena sida ngatur program ba sitak diri.

Pemeri nya mungkur agih belanja RM3,000 ungkup Komiti Pemansang enggau Pengelikun Genturung Pendiau (JKKK) Rumah James Berandah dikena ngatur program beripai; Gerempung Pengadil Pelilih Meradong ungkup aktiviti enggau program komuniti ba taun 2020 (RM2,500); Gerempung Main Bol Meradong dikena ngatur aktiviti (RM1,500) enggau JKKK Kampung Bintangor Sitak 1 Meradong dikena ngatur Pekit Street Soccer Zon 1 Kampung Abang Ali Bintangor (RM2,200).

Bela bisi nerima pemeri tu JKKK Rumah Bisa Melintang ke mungkur perengka muzik (RM1,560) kelimpah 12 buah meja ungkup Dewan Masyarakat Sungai Sian (RM1,080).

Pengawa nyuaka pemeri nya dikemujur Menteri Muda ba Opis Kepala Menteri (Pekara Koporat enggau Unit Komunikasi Awam Sarawak) Abdullah Saidol rambau ngulu Pengerami Ngelalu Temuai beserimbai enggau Program Mantar Krismas 2019 di Sungai Sian, kemari.

Abdullah ke mega Kaban Kunsil Nengeri (Adun) N.42 Semop bela bisi ngungkupka belanja dikena ngintu Taun Baru 2020 ngaga Raban Nembiak Sungai Sian, Muara Bunut enggau Selidap.

Program nya diatur Saberkas Pampang Meradong, JKKK Rumah Panjang (Sungai Sian, Muara Bunut enggau Sungai Selidap), komuniti 13 buah rumah panjang, dua kampung, raban bansa China enggau nengah Kerejasama Opis Servis N.42 Semop.

Kelimpah nya penatai lebih 400 peranak ke besemak, pengerami nya chukup richah sereta lantang kelimpah beperindang enggau bemacham aktiviti nyengkaum sukan rayat enggau nyabut tiket benasip.