SELANGAU: Opis Betanam Betupi Pelilih Selangau nengah kerejasama Gerempung Orang Bumai Pelilih Menua (PPK) Bagi Menua Sibu ngatur Program Betanam Betupi Ngaul Komuniti (Agricop) ungkup sitak DUN N.59 Tamin di Rumah Gamang Buang, Sungai Kemena, Balingian, empai lama.
Program nya dipenyadi Charlie Lunyong, ti ngari ke Kaban Parlimen Selangau, Edwin Banta.
Lebuh bejaku, iya ngenatai jaku minta ampun ari Kaban Parlimen Selangau ti enda ulih datai laban ngulu Aum Parlimen.
Iya mega meri tabi puji ngagai bala penyereta ti mujur nembuka kus pengelama dua hari sereta nambah penemu bekaul pengawa betanam betupi.
“Program baka tu beguna endar dikena negap komuniti menua pesisir ngambi terus ngemansang sektor betanam betupi nengah nemu enggau teknologi baru,” terang iya.
Nangkan nya, SAO Louis Micheal Balau ti ngari ke Pegawai Pelilih Selangau mega meri terima kasih ngagai semua ejensi ti ngambi bagi, sereta ngarap program baka tu ulih ditampung ba sitak bukai ngambi meri mayuh agi pemaik ngagai peranak menua pesisir.
Mayuh aktiviti diatur sepanjai dua hari program nya, nyengkaum licha betanam betupi, demonstrasyen manduk pemakai, sereta kaunter servis ari agensi baka Sarawak Skills Kuching, Universiti Kolej i-CATS, Opis Pengelantang Bagi Menua Sibu, PERKESO Bagi Menua Sibu, enggau pemekal rachun rumput.
Pia mega, bisi 300 paung buah nangka varieti J33 (Tekam Yellow) mega diagih ngagai penyereta ti bisi datai.
Sama datai, pengari Pegawai Betanam Betupi Bagi Menua Sibu, Jee Wie Ren, Penulung Pegawai Betanam Betupi Menguasa Opis Betanam Betupi Pelilih Selangau, James Alow Bunya, Unit Ngemansang Opis Betanam Betupi Sibu, Eloni Mahsin, Pemancha Mathew Belawan Daut, Penghulu Dom Brok, Penghulu Thomas Jawa sereta tuai-tuai komuniti lokal ke bukai. — EDISI UKAS
