BINTANGOR: Perintah bejalaika bemacham inisiatif ngemansang akademik nembiak kelebih agi ba menua ulu enggau menua pesisir.
ADUN Meradong, Datuk Ding Kuong Hiing madah, pengeransing perintah nyata dipeda nengah inisiatif ngemanah fasiliti sekula kelimpah bemacham bantu bekaul udah diagih.
Ungkup Meradong, iya madah, geran Program Tranfomasyen Menua Pesisir (RTP) dikena enggau manah ungkup tuju pelajar.
“Kitai (Meradong) ba penuduk lima sekula pemadu manah di Sarawak ba pemutus SPM tu tadi lalu aku pechaya RTP nya entara kebuah tikas akademik majak manah.
“Kebuah pia laban bantu ti diagih nya dikena enggau manah baka nyeleti infrastruktur sekula,” ku iya.
Kuong Hiing mansutka jaku nya lebuh dirandau pemberita ba opis iya, kemari.
Ngelansa pasal insentif, Kuong Hiing madah, nya endang pengawa iya kenyau ari nyadi penagri rayat ba sitak nya.
Inisiatif tu, ku iya dikena meransang genap nembiak ngambi ransing belajar.
“Udah tentu aku deka nampung pengawa meri insentif ngagai nembiak nyulut nyadi peransang sida terus mujur dudi hari.
“Aku ngarap semua sekula ba pelilih tu bulih pemutus manah ngambi kitai ulih nempa mayuh agi nembiak nyulut,” terang iya.
Udah nya, iya mega udah ngabas taba projek RTP ti dikemendar ba sitak Meradong.
Tu nyengkaum Tadika Methodist Bintangor, simpang Sekula Primari (SK) St. Augustine ngagai Lampu Trafik Jalai Kelupu Bintangor enggau Sekula Sekondari (SMK) Bandar Bintangor.
