KUCHING: Premier Sarawak, Datuk Patinggi Tan Sri Abang Johari Tun Openg udah bejadi pengawa nyua 12 kit latih ngagai jurulatih program Inisiatif Pustakawan ba Tetiap Rumah (LieH) ditu ensanus.

Pengawa ti diatur ba Pustaka Negeri Sarawak nya mega kelai ngelanchar tumu 50 Palan Komuniti Digital (DCC) ba selampur nengeri. Inisiatif LieH sebagi ari pengawa Perintah Sarawak ngerembaika akses sumber digital enggau pun penemu ba renggat baruh, setipak enggau visyen Sarawak nyadi nengeri maju bepenatai pemisi tinggi manggai 2030.

KRG ngemudi inisiati enggau tuju negap komuniti ti matih volunteer lokal nyadi Digital Knowledge Keeper, ti nyelinting pengawa ngatur penemu, pemansang ruang bilik, ngempung sumber komuniti sereta nyadi tuai ba rentayan digital.

Sepenyampau 12 Tuai Jurulatih Gerup Pansik Penemu udah dipadu ngatur program ba bagi menua diri empu, ari sukung Kaunsil Librari Mensia Mayuh Sarawak (Pustaka) ti nyadi bakih bejalaika program.

Berebak enggau nya, bisi tiga sempekat kerejasama entara sekeda institusyen strategik ditanggam, kelai nyukung ekosistem pemansang penemu enggau sumber digital komuniti.

Pengawa besilih dokumen sempekat keterubah entara Knowledge Resource Group (KRG) enggau Universiti Teknologi Sarawak (UTS) seraya sempekat kedua ditanggam Pustaka Negeri Sarawak enggau UCTS Consultancy Services Sdn Bhd (UCSSB).

Sempekat ketiga sehari nya entara Pustaka Negeri Sarawak enggau Strategic Resource Training Sdn Bhd (SRT) ke alai pengawa nya dikemata Abang Johari mega. Sama datai, Sapit Premier Datuk Amar Dr Sim Kui Hian; Sekretari Perintah Sarawak Datuk Amar Mohamad Abu Bakar Marzuki; Direktor Opis Kereja Raya Sarawak Dr Cassidy Morris enggau Kaban Kaunsil Pengatur Dewan Bahasa enggau Pustaka (DBP), Datuk Dr Jeniri Amir. SITI NURAIN RATANI