Anang irau anak masuk buding

KUCHING: Menteri Kanan Pelajar, Dr Radzi Jidin ngelalau apai indai ke bisi anak bemalam ba buding anang kelalu irau laban atur pengelikun endang nitihka tangkan ari KKM.

“Sekula ke bisi buding dibuka nitihka pemesai buding sekula nya.

“Nya alai, buding ke chukup endur nembiak lebih agi bekaul enggau takah enggau pangan diri dibuka baka ngelama tu.

“Buding ke mit agi, kitai enda ngemendarka semua nembiak ulih bemalam dia tang nitihka pemayuh tubuh ke chukup lalu nembiak ke dudi agi deka dikemendar bemalam dia enggau chara berenggat,” pia ku iya nerang.

Nerang baru, ku iya, buding ke bisi katil dua tingkat, semua nembiak dipelabaka ulih bemalam dia dalam timpuh 28 nyentuk 42 hari berengkah 24 Jun 2020.

Dr Radzi Jidin

“Kami udah beratika pekara tu enggau KKM. Nitihka lalau KKM, ungkup nembiak ke dulu tama buding, sida semina ngena katil baruh aja.

“Tang udah timpuh 14 hari, raban nembiak ke baru masuk ke buding deka diasuh ngena katil baru, sida ke udah dulu tama buding deka diasuh ngena katil atas. Atur tu seruran dititih nyentuk semua nembiak ulih diau ba buding.

Ungkup sekula buding ke bisi katil dua ringkat, semua nembiak dipelaba ulih masuk ke buding dalam timpuh 28 ngagai 24 hari bepun 24 June tu tadi.

T impuh pulai ke buding tu bepanggai ngagai penyampau nembiak ke udah ditetap piak sekula.

Radzi madah munyi nya rambau Aum Pemberita Menteri Kanan Pelajar di Putrajaya, kemari.

BUDING NEMBIAK…Gaya tusun katil ba dalam buding nembiak SMK Engkilili, Sri Aman.

Dulu ari nya Radzi madah nembiak sekula Pom 1 nyentuk Pom 4 enggau kelas ‘peralihan’ deka besekula baru kena 15 Julai 2020.

Iya madah, Opis Menteri Pelajar Malaysia (KPM) ngaga pemutus nya digaga bepun ari lalau Opis Menteri Pengerai Malaysia (KKM) enggau Opis Menteri Pengelikun Menua (MKN).

“Nembiak Primari 5 enggau Primari 6 mega berengkah besekula baru kena 15 Julai ti deka datai.

“Lalu nembiak Primari 1 nyentuk Primari 4 besekula belabuh 22 Julai,” ku iya.

Bekaul enggau nembiak Taun 6 Semester 1 Taun 2020, nama sida ke diterima masuk tau belabuh dipeda nengah portal KPM berengkah ari diatu.

Nembiak tu mega deka ngerijister nama sida kena Hari Tiga, 15 Julai 2020.

“Hari bulan semua sekula tu dibuka deka dikena sekula perintah, sekula bantu perintah, sekula peribit enggau semua institusi pelajar ke berijister nengah KPM.

“Sekula ke nadai berijister nengah KPM mega ditangkan ngambi muka sekula sida nitihka haribulan tu,” ku iya.