Anang malu nyanda penemu

KUCHING: Rindu bedagang bepun ari jaku peransang enggau jalai dirandang siku bakih ti mega siku ari ketuai ke ngembing mai singkang Saloma Amin datai ba tikas diatu.

Ngepunka dagang dalam taun 2017, Saloma berasai chukup benasip laban nerima geran enggau bantu dikena ngerembaika makit produk jauh agi.

“Siku Penulung Pemesai Pemansang JKM benama Puan Iton chukup puh enggau keran ngembing aku ngerandang dagang produk pengelandik jari sereta mantu aku ngiga makit nengah opis sida.

“Nasip endar bisi program dikumbai Wellbest, endur kami ti ngemeranka dagang produk pengelandik jari bejual sereta nempa rentayan dagang besai agi.

“Tambah mega, Wellbest tu nyadika pelasar kami bekunsika penemu enggau rejeki nengah karnival bejual ti diatur berenggat selampur nengeri,” ku Saloma lebuh dirandau Suara Sarawak ba taba Karnival Wellbest 2019 diatur di Metro City, Kuching, apin lama ke udah.

RANSING ATI… Saloma mantai semua asil keranjai jari rambau Karnival Wellbest 2019 di Metro City Matang apin lama ke udah.

Ku Saloma, peransang besai patut diterenak dalam ati iya nya anang sesekali berasai malu ngiga penemu. Anang enggai betanya enti kitai enda nemu utai.

“Munyi ku peransang Puan Iton ngajar aku, anang madah enda ulih laban nadai utai enda alah asal ati kitai deka belajar.

“Keterubah aku nguji enggau orang beranyam suba, aku semina nemua anyam tunggal aja, ulih nganyam bakul mit. Ketegal jaku peransang ari Puan Iton mih aku nerima semua nya ari sukut positif.

“Lebuh aku belajarka bansa buah anyam bukai ba orang ke beserimbai pendiau enggau aku di Kapit. Aku meri terima kasih ngena mata duit laban sida sanggup bekunsi penemu sereta ngajar aku dataika ulih ngepunka buah anyam kediri.

“Terubah belajar endang bisi asai deka mantul kelebih agi kitai ke nadai seling penemu baka aku tu, belajar buta dataika aku nyau landik nganyam bakul bansa Penan.

“Anyam bakul tu chukup tusah sereta mar laban bisi chura enggau buah asal bansa sida iya empu.

“Udah nya aku ngulu bengkel nyait kain buriek, ngaga sugu tinggi enggau kelas pengelandik jari bukai dikena nambahka penemu sereta kaul bebakih mayuh agi.

“Tambah mega dunya diatu semua penemu enggau pengelandik meseti dibeli laban kitai ke nyilih ngena mata duit ngambika penemu nya berekat agi, lekat agi mih munyi ku sida ke tuai.

“Aku mega bisi nitihka raban orang ke sama bedagang, neladan utai ke patut sereta berati enggau nyeleti pengurang diri empu,” ku Saloma bekunsika pengawa diri.

Ku Saloma, iya bulih peluang nyereta program tu laban nerima bantu ninting bulan ari Opis Pengintu Pengelantang Mensia Mayuh (JKM) ngarika tiga anak menyadi ti diibun iya.

LANDIK… Macham asil pengelandik jari baka antin, tangu, tengak, pua kumbu bisi dijual Saloma nyerumba Karnival Wellbest 2019 di Metro City Matang ditu.

Taja bantu nya udah diketu laban sida tiga diri menyadi enda diibun iya agi tang Saloma chakah ngaul diri ba mayuh bengkah aktiviti enggau program diatur opis nya .

“Diatu JKM bisi chap dagang sida empu dikumbai Wellbest dikena mantu mantai enggau ngelakuka produk raban dibaruh embing opis sida lalu aku empu bisi sticker produk ‘Saloma Kraf’.

“Aku diatu fokus nempa rentayan makit laban deka nemu gaya makit enggau utai dikerindu mensia mayuh ngambi ulih nangkup peminta makit kemaya hari.

“Nya alai aku nguji sebarang chara ti ulih ngelakuka produk baka nengah dagang onlibe ba media rama nyengkaum Facebook ke alai aku bisi numbuhka siti pages diberi nama Mami Alysha Kraftangan.

“Naka diatu mujur endar pengawa tudah aku nengah pages nya laban mensia mayuh ulih ngelawa, meda ni bagi produk dikedeka sida lalu meli enggau rega udah dipesetuju. Semua dagang tu digaga nengah online,” ku iya nerang.

Saloma madah, kelimpah ari asil utai dianyam, iya mega bisi nyual pua kumbu, antin digaga ari leka manik asal kitai kelia, tangu ti bisi dua bansa, tangu amat enggau tangu digaga mit kena ngelagu kerita tauka digitang ba dinding nyadika pemandang.

Pemanah timbal diterima ari dagang nengah online endang ngemantupka ati Saloma empu lalu bisi sekeda ngudar dikena diri empu tauka meli mayuh sekali, nyadi orang tengah.

Orang ke meli mega ku iya datai ari selampur menua Sarawak dataika Semenanjung Malaysia laban sida ulih ngudar nengah pages Saloma empu.

Ngelansa pasal pejalai iya nyereta Karnival Wellbest, Saloma madahka diri enda masau peluang diberi lalu naka ulih datai enti sema bisi dikangau.

“Terubah suba aku enggau Karnival WellBest Sarawak di Sarikei (2017), Manjma Mall, Kuching (2017), Permaymall, Miri (2018) enggau ba Metro City Matang, Kuching (2019) ditu.

“Ari nya aku dikelala ari produk dibai laban bisi penyelai enggau pengelebih ari produk bukai.

“Semua tu ditibak ari runding aku empu laban aku beratka peminta, pengelantang ati orang ke meli, peneguh asil keranjai jari sereta beratika pemesai sereta chura enggau langkar buah ti setipak enggau manding dikena sida.

“Orang ke meli mega deka puas ati enti sema utai dibeli sida setipak enggau rega dibayar. Naka diatu mayuh sida dua tiga kali ngudar ba aku baru,” ku Saloma temegah asil keranjai jari iya dikerindu mensia mayuh.

Iya madahka diri semina ngaduka semua pengawa ba rumah aja lalu produk dijual endang asil ari keranjai jari iya empu kelimpah ari pua kumbu ti dibeli ari orang rumah panjai.

“Juluk ati endang chukup mayuh laban deka mansang sereta maju nitihka singkang orang bukai.

“Dalam ati din, aku deka bisi rumah diri empu ti besai, alai ti lantang agi endur aku ngaduka semua pengawa, bisi kedai kediri empu, nyamai orang ngelawa jemah.

“Aku mega ingin endar numbuhka palan ngatur bengkel ngambika bisi endur aku nambahka penemu, asil produk deka manah sereta alus agi. Aku deka bisi pemansang enggau utai ke baru ninting taun.

“Kebuah pia ngambika orang enda nemu leju meli utai digaga aku,” ku Saloma madahka juluk ati diri.