APAI SALI MANDOK PAKU LAWANG

Tusun satu…

KIRA ke setahun nampun di bukit, lalu sebulan nandan di langit, udah bekau Apai Sali ke bam tauka rangka ka makai lelabi nengali kediri, dia iya lalu nemuai ngagai pangan tauka akan iya ti benama Apai Seumang Umang.

Datai iya ba rumah Apai Seumang Umang, Apai Sali lalu nganggau nanya ke penyadi rumah Apai Seumang Umang tau enda kini di tiki enggai ke bisi penti pemali taja pan pelepa nadai di engkah ke Apai Seumang Umang ba pala tangga.

“Niki unggal, Niki akan Apai Sali,” pia ku Apai Seumang Umang ngelalu ke iya enggau ati ti gaga laban seduai ti lama bendar udah nadai ngagai pangan diri.

Nyadi ninga munyi nya dia Apai Sali pan nadai kakang ati lalu niki rumah Apai Seumang Umang laban seduai iya sigi teleba enggau pangan diri.

Datai ba rumah Apai Seumang Umang dia deh lalu pansut indu siku, nyadi indu nya nadai utai ngemajik majik nya lebuh rambau nya kelia lalu mai tikai selambar serta lalu nganchau ke tikai bebuah ke naka iya pemanah ambi ke bisi alai Apai Sali duduk.

Nyadi tudah Apai Sali lebuh ke meda indu nya pansut nganchau tikai ba ruai endang tak tebelenga temati kutu pa pengerindu iya meda pemajik gamal indu nya tadi.

Apai Sali pan lalu enda berasai sambil ti tebelenga nya sempat ga iya ngijap ke mata ngagai indu nya tadi.

Meda iya baka nya dia Apai Seumang Umang lalu nundi Apai Sali, “Tau nya digayap nuan deh akan,” ku iya bungah meda akan iya Apai Sali ti endang pama bungah enggau semua orang.

Apai Sali pan lalu nyaut.

“Anang ke semina deka ngayap ngagai iya aku akan, tak lalu ninduk kediri enggau iya ka meh aku,” pia ku Apai Sali sambil tak malik ke tisi.

Indu nya tadi pan lalu tuchum serta malik ke bukai laban malu malik ngagai Apai Sali ninga jaku iya ti munyi nya tadi lalu sekumbang ti ka tama ke bilik ke baru sempat ga indu nya tadi nyeling belalai ngagai tudah Apai Sali ti benong duduk ba tikai ti di anchau ke indu nya tadi.

Indu nya pan lalu sempat ga nibar ke jaku ngagai Apai Sali sebedau iya tama ke bilik baru.

“Anang pia meh nuan Apai Sali. Nuan ga udah bisi bini,” pia ku iya.

“Oh ti baka nya ukai enda tau bujang baru ga aku tu deh wai,” pia ku iya nyaut lalu ngetup ke ngeli iya laban tak abis ati meda indu nya.

Udah nya indu nya pan lalu pansut baru ga ke ruai nganjong baku alai sarang insap enggau sarang pinang ambi ke bisi di tungga Apai Sali sekumbang ti berandau enggau Apai Seumang Umang lebuh ke berandau ba ruai dia.

Mayuh macham meh utai ti di kerandau ke seduai lebuh maya nya. Apin lama udah seduai iya ti betungga duduk berandau dia, alai seduai iya lalu ninga orang indu tak nyau danggai danggai ngumbai mai makai ke bilik.

Nyadi indu nya tadi anak dara Apai Seumang Umang.

“Makai aya, makai! Lapar nuan jangka aku laban ti pama diri ga penyauh rumah kita ari kami ditu,” pia ku anak dara Apai Seumang Umang ngumbuk Apai Sali mai makai ke bilik sida.

“Au meh’” ku iya.

“Eh anang ngaya ngaya ke pangan endu, agi bujang aku tu. Bujang baru,” pia deh ku Apai Sali.

Kira ke sepengelama dilua ka iya sempa pinang dia Apai Sali nya pan lalu tama ke bilik laban pemakai sigi udah di enah ke anak Apai Seumang Umang nya tadi.

Tak baru berengkah makai Apai Sali enggau Apai Seumang Umang dia Apai Sali lalu bejaku nanya Apai Seumang Umang.

“Nama batang enggau daun tu tak bengat ngenyamai nya deh akan.”

“Eh aya! Paku nyah nya, ulih aku ngiga di tembawai langkau ba belakang rumah kami tu,” pia ku anak dara Apai Seumang Umang.

“Eh, anang be aya aya. Tak kangau ke unggal pia nyah. bujang baru deh aku tu,” pia ku Apai Sali sempat ga nyaut.

Badu sida iya nya tadi makai dia Apai Sali lalu madah kediri ka pulai ngagai Apai Seumang Umang.

Apai Sali pan lalu mupok mulai kediri ngagai rumah iya empu, lalu sepemanjai jalai iya ti mulai kediri, iya endang nadai jaku bukai, iya nya beulang ulang nyebut.

“Paku! Paku! Paku! Nyamai amat paku.

Sekayu kayu jalai iya nyentok ke nyau ka datai ba rumah iya laban enggai kediri enda ingat ke utai ke lauk ba rumah Apai Seumang Umang tengah hari nya tadi.

Datai Apai Sali ba sungai siti tak enda mukai mukai deh tudah Apai Sali laban ti beguai guai serta belanda betiti ka jalai, lalu belanda niti batang ti udah burok nyengkar sungai nya dia deh batang kayu nya lalu patah dua naban ke iya laboh ke ai.

Serta meh iya nyau pansut ari sungai nya dia iya lalu nadai ingat ke nama utai ti ke lauk sida iya Apai Seumang Umang tengah hari nya tadi. Nyepi diri empu enda ingat ke lauk

“Paku” nya tadi dia Apai Sali lalu nyelam dalam sungai ba alai batang nya ti patah tadi nyentok ke leka mata iya nyau merah baka buah kundong, tang lalu ga iya enda ingat kediri ti belauk ka “Paku” nya tadi.

Apai Sali pan lalu nikal baru ga ngagai rumah Apai Seumang Umang laban ka nanya ke nama lauk sida iya tengah hari nya tadi.

Betampung minggu baru…