SIBU: Mensia mayuh ti minat nebah sape enggau ngajar ditesau masuk dua kelas nya ti diatur Kelab Sape Dayak Sibu (KSDS) bepun bulan Ogos tu.
Tu berindik ari kelab nya udah bisi palan kediri ba Nicchi International Sibu, Tingkat 1, No.6E, Jalai Kampung Dato ditu.
Chairman iya, Anthony Abong madah, kededua kelas nya deka diatur ninting hari tauka ninting bulan bepanggai ba peminta bala penguna.
“Sekumbang betesau sebelah ruai Facebook pasal Palan KSDS tu, kami nerima mayuh tanya ari mensia mayuh ti minat masuk kelas tu.
“Nya kebuah, kami ngarapka ba bulan Ogos tu, kami ulih ngatur kededua aktiviti nya enggau lanchar sereta nerima sukung ari sida ti minat belajar nebah sape enggau belajar ngajat,” ku iya.
Anthony madah, palan baru nya diatur benung diias enggau nyendiaka fasiliti bukai.
Ku iya, palan ti disuwa nya asil ari pupu belanja ari kaban KSDS ninting bulan.
“Puji Tuhan, kami mujur ngamatka juluk ti lama udah diingin tu.
“Kami sanggup ngena duit kami empu (nyuwa kedai) ngambi main asal terus diangkat sereta ditampung rebak baru,” ku iya nyemetak.
Barang sapa ke bisi tanya bukai tauka deka nemu penerang silik tau telefon ngagai Anthony ba lumur, 013-5650914 enggau Sekretari KSDS Lily Samantha ba lumur, 013-5788227.
Mensia mayuh mega ulih meda ruai Facebook KSDS ungkup penerang pemadu baru pasal kelab nya.
