ART lebih murah ari LRT

Perintah nengeri deka mansik pengawa ngena sistem pengangkut tu

KUCHING: Perintah Sarawak deka mansik pengawa ngena sistem Autonomous Rapid Transit (ART) ba nengeri tu.

Kepala Menteri Datuk Patinggi Abang Johari Tun Openg madah pengawa ngena ART lebih murah dibanding enggau Light Rapid Transit (LRT) ke udah bisi diatu.

“Ungkus ngaga ART semina satu pertiga ari LRT ke udah bisi.

“Taja pia, pekara tu agi dalam pansik…anti dulu mih,” ku iya madah.

Abang Johari madah munyi nya lebuh dirandau raban pemberita pengudah Pengerami Ngingatka Hari Bandaraya Kuching ke-31 di Dewan Kompleks Islam Sarawak ditu, tadi.

Nangkan nya ku iya, LRT tu hibrid entara kereta api enggau bas rapid.

“Bida entara ART enggau LRT tu, ART nadai ngena trek tang ngena tayar.

“Bisi perengka baka kelai ba jalai alu lalu iya (ART) deka transit nitihka kelai nya,” ku iya.

Berebak enggau nya, Abang Johari madah tu lebih jimat dibandingka enggau perengka pengangkut ke udah bisi.

“Kitai enda ibuh muka jalai alun bukai dikena ART,” ku iya.

Datuk Patinggi Abang Johari Tun Openg

Suara Sarawak