INDUN SILONG
Suarasarawak.news@gmail.com
KUCHING: Akademi Dayak Iban Sarawak (ASADIA) nengah kerejasama Kaunsil Kraf Jari Sarawak (SCC) bisi ngatur kelas ngaga sugu tinggi.
Tuai ASADIA, Mabong Unggang madah, sugu tinggi tauka sugu jegit siti ari kereban asal bansa Iban ti dikena bala indu ngena ngepan.
“Sugu tinggi deka ngasuh indu ti ngena nya dipeda tampak agi sereta ulih ngasuh raras tubuh sida manah agi dipeda.
“Enti nadai sugu tinggi, pendiau indu ti dianta nya enda menyana tauka timpang dipeda,” ku iya ba sebengkah penerang kemari.
Mabong madah, ngambi sugu tinggi nya enda punas, ASADIA chakah ngatur Kelas Ngaga Sugu Tinggi.
“Kelas tu diatur nengah kerejasama SCC lalu dipasuk 30 penyereta ti diajar Pengajar Victoria Jimy seduai Tanjong Tinggom seraya dibantu Bronica Michelle Baran.
“Aku ngarap sida ti belajar tu landik ngaga sugu tinggi lalu ukai semina ngaga ungkup diri empu aja tang ngerandang dagang.
“Tu beguna amat dikena ngerembaika pesaka ngepan Iban ngagai mensia mayuh,” ku iya.
