BINTULU: Berindik ari ujan bangat enda ngetu empai lama, sekeda genturung di sepanjai Sungai Plan ampuh lalu ai manggai tiga kaki penalam ba sekeda endur.

Kaban Parlimen Bintulu, Datuk Seri Tiong King Sing madah, atur lengkas patut diambi dikena mutar penanggul betandu nyengkaum ngerawang enggau meresi Sungai Plan.

Iya madah, pengawa ngerawang sungai ngena ekskavator patut dipejalai lengkas enggau optimum dikena nambah tikas pengulih nagang bah di genturung nya

“Laban genturung Sungai Plan ba baruh pegai sekeda ejensi, aku ngerah Opis Parit enggau Entali Ai (DID), Opis Tanah enggau Survei, Kaunsil Pemansang Bintulu (BDA) sereta Kaunsil Pemansang Berumah Sarawak (HDC) dikena numbuh siti tim meraka opis,” ku iya.

Tiong bejaku munyi nya lebuh ngabas sekeda genturung ti dikelala nyadi zon mirah bah begulai enggau raban bekuasa bukai dikena matau gaya bah pemadu baru di endur nya, empai lama. Iya ti mega Menteri Dagang Temuai, Seni enggau Budaya madah, siti ejensi deka dichiri nyadi pemungkal dikena nyeriris inisiatif ti dipejalai

Terang iya, nya nyengkaum ngelala palan ti amat enggau pun penanggul ba ili sungai, ngaga gazet sungai, netap pangku pengawa genap ejensi sereta ngelanggur pelasar teknikal enggau bejalai pengawa ngerawang.

“Sebarang kilang tauka stor besai ti ditemu didiri ba genturung gazet parit tauka sungai meseti dipuang tekala nya.

“Atur nerit adat deka diterit ngagai sebarang raban ti puntan meri kerejasama.

“Opis Tanah enggau Survei deka bejalai pengawa meresa taba enggau nerit atur nitih undangundang,” ku iya nyemetak. Nangkan nya, BDA mujur bejalai inisiatif tumu ngerah kunteriktor ngepun pengawa meresi enggau ngerawang parit ti benung chakah dipejalai.

Pengawa nya disadang tembu ba timpuh tiga minggu bepanggai ba gaya hari.

Tampung Tiong, iya deka terus matau pejalai projek nya dikena nentu projek nya lanchar kelimpah nambah pengelanchar sistem parit sereta ngurang empas ari penusah bah ti ulih ngeruga peranak lokal.