SARATOK: Penumbuh gerempung ukai perintah (NGO) ke diberi nama Gerempung Pemansang Dayak Bintulu (Bangun) dikearap ulih nyadi siti pelasar engkeman dikena nyungkak ke tikas ekonomi Dayak lebih agi di Bintulu.
Chairman iya,Thwaites anak Langak,55 taun madahka tuju Bangun ditumbuhka ngambi ulih nyadika siti pelasar alai meri latih enggau peneleba dalam pekara pelajar,pemansang ekonomi,betanam betupi sereta enda tinggal mega ba adat main asal bansa Dayak.
“Kitai ngarapka Bangun tu ulih mujur nyadika siti palan alai kitai Dayak lebih agi di Bintulu ditu dalam ngerembai ke agi pengelandik enggau peneleba sida dikena ngemansang enggau nyungkak ekonomi diri.
“Tu entara siti juluk ti ngujungka kami sebuat mutus ati beserakup numbuhka Gerempung Pemansang Dayak Bintulu tauka dipuntang enggau nama Bangun,”ku iya maya dirandau Suara Sarawak, apin lama ke udah.
Ngelansa perambu keterubah,Thwaites madah, Bangun ngelanggur deka bekerejasama enggau raban Opis Kaunsil Kandang Menua (PBT) enggau Universiti Betanam Malaysia (UPM) di Bintulu ditu ngatur program bekaul enggau pengawa betanam betupi.
Nya alai, Thwaites meransang bala Dayak di Bintulu anang lembau ngerejista diri nyadi kaban Bangun awak bela bekunsi penemu enggau besaup ngulihka pemujur ke pemaik semua raban.
“Dalam ngereja pengawa baka tu kitai endang begunaka tubuh ti mayuh, laban enda alah dikereja tubuh ke mimit. Tambah mega kitai ngembuan juluk ti besai iya nya deka ngangkatka ikas ekonomi bansa Dayak.
“Pemujur pengawa nya ulih nyadi nyata enti kitai beserakup sereta begempung manah nuju siti juluk ke sama.
“Diatu kitai bisi penanggul mimit ba sukut ngiga belanja dikena ngatur program ketegal pengerekai Covid-19,” ku iya.
Ungkup penemu Bangun udah dikemendarka Opis Pengerejista Gerempung (ROS) kena 26 Januari tu tadi lalu bisi 100 iku kaban udah ngerejister diri nyadi kaban gerempung.
Barang sapa ti deka masuk nyadi kaban Bangun tau berandau terus enggau Thwaites ba lumur 012-8984328 tauka ngelawa opis Bangun ba No. 379, 1st Floor, Parkcity Commerce Square, Phase 5, 97000 Bintulu ditu.
Diatu komiti Bangun bechairman Thwaites, Sapit Chairman 1 Agat Sagai, Sapit Chairman 2 Make Jiwan, Sapit Chairman 3 Michael Jok Mering, Mandal Chairman 1 Dennis Lukong, Mandal Chairman 2 Rowena Ningkan.
Udah nya, Sekretari Rinit Nyandang dibantu Rosita Ikang, Tukang Wang Nalong Buda dibantu Frank Bliang Ilit, Tuai Pemadah Johny Chuat sereta bisi tujuh iku Kaban Komiti Besai (AJK) iya nya John Sini Benang, Ayum Balai, Stanley Elvin Michael, Emelia Jane Dingus, Kudan Ningkan, Henry Tuah enggau Simbeh Renang.
