Baram dikearap nyadi Bagi Menua ke-13

MARUDI: Raban tim Baram patut ngenataika siti keretas kereja bekaul enggau peminta ngangkatka sitak Baram nyadi Bagi Menua Ke-13 ngagai Kepala Menteri Datuk Patinggi (Dr) Abang Haji Johari Tun Openg.

Tim Baram diarika ADUN Marudi Datuk Penguang Manggil, ADUN Mulu Datuk Gerawat Gala, ADUN Telang Usan Dennis Ngau enggau Kaban Parlimen Baram Anyi Ngau.

Penguang madah Bagi Menua Baram nitihka perambu nya mungkur tiga pelilih iya nya Pelilih Marudi, Pelilih Beluru enggau Pelilih Telang Usan.

Iya madah, nyema perambu nya nyadi nyata, nya deka ngelanchar agi tusun pengawa ngatur, meri agih belanja, negapla pemansang ekonomi enggau infrastruktur di Baram.

Nya alai, ku iya ngarap Abang Johari enggau Perintah Sarawak ulih diperunding enggau ngamatka juluk sida nya.
Penguang, taja pia madah ba pengawa ngemansangka Marudi enggau tuju ke manah dikena ngubah tikas pengidup rayat Marudi, bisi sekeda piak nguji ngajum rayat enggau mejah pejalai sekeda projek lalu ngumbai diri ngeringka rayat.

PROJEK PEMANSANG : Kepala Menteri Datuk Patinggi (Dr) Abang Johari mendingka penerang pasal projek pemansang Marudi ari serikat kunterikta ke udah dipadu.

Tambah mega, piak nya ku iya, madah kitai ke ngereja pengawa baka nya, kitai ga dikumbai ngayahka duit rayat seraya madah raban nya ukai semina ngasuh rayat saru penemu, tang sida seruran ngachau enggau mechah kelimpah ngaga perintah GPS ngambika dipeda jai.

Kitai enda mudah anchur ketegal pengawa ke baka nya lalu ngeruga penuduk kitai.
Kami ditu mengkang kering lalu kami meruan meri sukung penuh ngagai ketuai kitai enggau perintah GPS lalu kitai bisi kapten, ku iya maya pengerami bejadika Waterfront Marudi, ditu kemari.

Kelai bejadika projek beungkus RM23 juta nya dipenyadika Kepala Menteri Datuk Patinggi (Dr) Abang Haji Johari Tun Openg.

Projek Waterfront Marudi, terubah iya projek dikemendar dibaruh perintah besai sebedau tu.
Tang pejalai projek diketu pengudah perintah Pakatan Harapan menang ngujungka projek tu nyau dibayar perintah Sarawak.

Sama bisi datai Sapit Kepala Menteri Datuk Amar Douglas Uggah Embas, Menteri Utiliti Datuk Sri Stephen Rundi Utom, Menteri Kaunsil Kandang Menua Professor Datuk Dr Sim Kian Hui, Sapit Speaker DUN Datuk Gerawat Gala, Kaban Parlimen Baram Anyi Ngau, Kaban Parlimen Bintulu Datuk Sri Tiong King Sing enggau ADUN Telang Usan Dennis Ngau.

Dipelabaka 4,000 iku orang ngulu kaunsil bejadika Projek Marudi bepalan ba Laman Marudi, kemari.