KAPIT: Perintah Sarawak deka nganti semua bateri sistem kuasa solar ti udah dilekat ba kandang menua Kapit bekau ari prestasi kuasa nya ti majak jai sereta enda ulih agi meri bekal kuasa ti konsisten.

Premier Sarawak, Datuk Patinggi Tan Sri Abang Johari Tun Openg madah, taja nengeri tu udah ngalih ngagai ngena kuasa solar, tang sistem nya agi bisi timpuh idup ti ditetapka laban bepanggai ba kapasiti bateri ti dikena.

“Bateri solar ti dilekat sebedau tu enda tan lama agi laban semina ulih meri bekal kuasa karan urung tiga jam aja.

“Nya alai, aku minta Menteri Utiliti enggau Telekomunikasyen, Datuk Sri Julaihi Narawi enggau Sarawak Energy Berhad (SEB) nukar semua bateri ti udah dibekal ba kandang menua Kapit ngagai bateri baru,” ku iya.

Abang Johari bejaku munyi nya rambau bejadi Program Sarawakku Sayang di Kapit ditu kemari.

Ku iya, pengawa nya beguna dikena nentuka peranak terus ngasaika bekal kuasa karan ti lebih entap sereta konsisten nengah sistem kuasa solar baru.

“Di menua China diatu sida benung bejalaika pansik ngasilka bateri ti ulih tan nyentuk 12 jam.“Enti teknologi tu mujur, nya deka meri penguntung ti besai ngagai sistem kuasa solar laban bekal kuasa nya ulih disimpan sereta dikena dalam timpuh ti lama agi,” ku iya.

Iya madah, teknologi bateri kapasiti tinggi nya dikumbai ‘Battery Energy Storage System’ (BESS), ti ngembuan potensial nambahka pemanah nyimpan kuasa enggau ngenegapka bekal kuasa karan bepelasarka kuasa solar jemah ila.

Ku iya, dalam pengawa Sarawak deka ngalih ngagai polisi gadung menua, sekeda kuasa ti enda manah tauka ti ngeluarka karbon udah diketuka diekspot baka eksport arang.

“Ba Sejingkat, kitai udah nguna kuasa ‘biochar’, suba ‘biocharcoal’, tang arang nya udah ditingkilka nyadi ‘biochar’ bepelasarka teknologi ‘biomass’.

“Baka nya mega enggau di Balingian, laban kitai udah ngalih ngagai polisi manah ke rampa menua nya alai semua kuasa ti ngeluarka karbon kitai tukar semua.

“Nya alai, kitai nadai export arang agi, lalu kitai mega enda ngeruga reputasyen kitai nyadi nengeri bepelasarka ekonomi gadung,” ku iya.