KUCHING: Komiti Pemansang Menua Pesisir Bintulu nya inisiatif begulai Kaunsil Pemansang Bintulu (BDA) dikena merambu enggau mantaika rintai ngenulu perambu sekeda projek pemansang ba sitak menua pesisir Bagi Menua Bintulu.
Menteri Industri Pemakai, Komoditi enggau Pemansang Wilayah, Datuk Seri Dr Stephen Rundi Utom madah, pengawa ngulihka pemendar agih belanja ba projek pemansang.
Ku iya, tu kelebih agi infrastruktur pemun baka jalai alun, utiliti enggau sosio ekonomi ba menua pesisir di Bintulu nengah renggat keterubah Strategi Pemansang Pengudah COVID-19 2030 (PCDS2030) benung dipejalai di baruh Langgur Pemansang Malaysia Lumpar Ke-12 (RMK-12) ti belabuh ari taun 2021 ngagai 2025 lalu nampung Langgur Malaysia nyentuk 2030.
“Inisiatif nya dikena nyungkak ekonomi menua sereta ngubah tikas pengidup sereta pengelantang rayat kelebih agi ba menua pesisir Bintulu.
“Semua bela nemu Bintulu nya entara hab industri enggau ngeluyang minyak enggau gas besai di Sarawak lalu enda ulih dikeenggai bagi menua tu penyungkak besai ekonomi Sarawak enggau pemujur ngagai PCDS 2030.
“Nya kebuah, dikena ngerumban pengawa tu, kitai begunaka infrastruktur baka rentayan jalai alun ti manah ngelawa sitak tu enggau mengeri,” ku iya.
Dr Rundi mansutka jaku nya lebuh bejadi Makmal Komiti Pemansang Menua Pesisir Bintulu di Kuching, kemari.
