KUCHING: Mantik Artem Company (MAC) deka ngatur Bengkel Pengawa Nyikap Komprehensif Pekit Belagu ti deka diatur dua hari bejurut kena 30 November nyentuk 1 Disember tu di Hotel Penview.
Pemungkal MAC, Lewelyn Lawas Julin madah, bengkel nya deka berengkah diatur pukul 8.30 pagi nyentuk 4.30 lemai.
Iya madah, bengkel nya diatur pechuma ungkup mensia mayuh kelebih agi sida ti minat ba pengawa belagu.
“Ungkup penerang, bengkel tu dibuka ngagai bala nembiak sekula enggau mensia mayuh ti beumur 16 nyentuk 30 taun aja sereta ngembuan minat ti besai ba pengawa belagu.
“Nambah ke nya, bengkel tu semina dibuka ngagai sida ti apin kala ngerikod enggau ngeluarka lagu ba sebarang serikat pengeluar lagu.
“Taja pia, semina 30 penyereta keterubah aja ti deka diambi ngulu bengkel tu lalu setipikit deka diberi ngagai bala penyereta.
“Nya alai, enti kita beminat deka nambah penemu nengah bengkel tu, kitai diperansang ngerejister diri enggau lengkas ngagai aku ba lumur 016-8620605 tauka nitih Facebook @Mantik Artem,” terang iya.
Pengajar ti deka meri licha maya nya ila iya nya Pengajar Vokal enggau Piano ti datai ari Sabah, Rhowell Roland.
Iya mega siku Menijar enggau Pengajar di Fortissimo Music Studio ti bepalan di Tuaran, Sabah kelimpah gawa nyadi Pengelicha Ensemble Vokal di Universiti Teknologi MARA (UiTM) Kota Kinabalu.
Lebih narit ati, bengkel nya nerima sukung ari Opis Menteri Dagang Temuai, Industri Kreatif enggau Seni Pemerindang Sarawak (MTCP).
Lewelyn madah, tuju bengkel nya diatur dikena nambah enggau bekunsika penemu pasal pengawa belagu ngagai bala penyereta kelimpah nyendia latih ti komprehensif ngagai sida.
“Tu nyengkaum teknik sada nyawa (vokal), interpretasyen lagu enggau penemu nguasa panggau ti beguna amat dikena meri penerang enggau peneleba tumu ngagai penyereta sebedau sida masuk sebarang audisyen tauka pekit belagu.
“Pia mega, tu dikena bekunsi strategi nyikap diri ari sukut runding enggau fizikal nyengkaum teknik ngatur penusut runding, pengirau, nagang diri sereta chara beinteraksyen enggau bala akim sereta peninga.
