KUCHING: Komiti Penyangga Penusah Ngenyit Nengeri (JPBN) nyemetak madah, semua peranak Malaysia ari Semenanjung Malaysia ti deka tama ke Sarawak deka dikuarantin pengelama 14 hari ba palan kuarantin bepun seharitu (10 Oktober) tu.
Chairman iya, Sapit Kepala Menteri Datuk Amar Douglas Uggah Embas madah, sida deka beperesa Covid-19 ba hari kedua enggau hari ke-10.
“Bayar kuarantin enggau beperesa Covid-19 deka ditanggung sida empu lalu semina rayat Sarawak aja deka dipelanja Perintah Sarawak.
“Kami ngaga pemutus nya pengudah baum kemari beduduk ari kes ke nambah ba Sarawak,” ku Uggah.
Uggah mansutka jaku nya ba aum pemberita Covid-19 di Begunan Dun Lama, ditu ensanus.
Nangkan nya, iya madahka piak Polis DiRaja Malaysia (PDRM) deka matau sida ke udah diasuh kuarantin diri ba rumah.
“Barang sapa ditemu ngelanggar atur nya deka kena ukum undang-undang di baruh Akta Pencegahan dan Pengawalan Penyakit Berjangkit 1988 (Akta 342),” terang iya.
Iya mega madahka, piak PDRM udah tetemuka siku lelaki ngelanggar atur kuarantin diri ba rumah lalu udah dikompaun kena Hari Tiga tu tadi.
“Barang sapa ti ngasaika sida enda ulih kuarantin diri ba rumah ulih minta dikuarantin ba palan kuarantin ti udah disedia,” ku Uggah.
