KUCHING: Beratus chef enggau peminat kulinari ari menua tu enggau menua luar deka begempuru di mengeri tu serimbai Trofi Dunya Kulinari Borneo 2026 (BCWC 2026) bulan Ogos tu.
BCWC 2026 ti keterubah diatur ba nengeri tu enggau Pulau Borneo deka diatur kena 5 nyentuk 7 Ogos di Balai Alumni SJK Chung Hua No 3 lalu deka digulu urung 500 penyereta ari chef, tukang sumai enggau nembiak kulinari.
Menteri Dagang Temuai, Industri Kreatif enggau Seni Pemerindang Sarawak, Datuk Abdul Karim Rahman Hamzah madah, pekit nya pekara pemadu ngemegah ba kalinda aktiviti antarabansa Sarawak.
“Kitai benung ngemujur inisiatif Taun Nemuai Ke Malaysia 2026. Kuching mega diaku nyadi Mengeri Kreatif Gastronomi UNESCO.
“Landskap kulinari kitai ti kaya, bemacham enggau beguna negap tradisyen komuniti pupu bansa di nengeri tu majak diaku ukai semina di Malaysia tang mega ba renggat dunya.
“BCWC 2026 ti diatur di Kuching ari 5 nyentuk 7 Ogos tu dikena nampung pengawa nya,” ku iya.
Karim madah munyi nya ba aum pemberita serimbai BCWC 2026 di Begunan Baitul Makmur 2, ditu ensanus.
Iya madah ke pekit tu meri besai reti ngagai chef, tukang sumai enggau peminta dunya kulinari menua.
Ku iya, ba mayuh chef biak enggau sida ti besai juluk di selampur nnegeri tu, juluk bepekit ba panggau antarabansa ngelama tu suah diasai ke kelalu jauh, baka semina ungkup sida ti ulih ke menua luar, ngulu pekit antarabansa sereta ditisih raban bekuasa kulinari tebilang dunya.
“Bulan Ogos tu, penau lokal kitai enda ibuh nepan taja siti penerebai tauka melanja seringgit ungkup pejalai ke menua luar aja ngambi diperati panel ari chef antarabansa enggau master chef mayuh peneleba.
“Bisi 40 iku deka dibai ari menua luar ngambi begulai enggau 34 akim ari Malaysia, bela mai peneleba bepuluh taun ti diturai ba dapur selampur dunya,” ku iya.
Ku iya, chef Sarawak deka ngasai ke peluang ti jarang diulih ngambi bepekit, ari stesyen siti ngagai stesyen siti begulai enggau penyereta ari serata dunya.
Iya mega madah, sida deka bekunsi chara, besilih penemu, nguji pemakai pangan diri enggau nakar penau ukai bepelasarka standard dalam bup aja tang mega betemu terus enggau bakih antarabansa sida.
“Peneleba baka tu suba begunaka tikit bilun, visa, timpuh panjai ninggalka rumah enggau ungkus ti besai agi. Sehari tu, peluang nya datai terus ngagai menua kitai empu.
“Ba aku, tu mih reti BCWC 2026. Tu ukai semina pekit tang pengawa meranak puku ngagai rayat kitai.
“Tu mega nyadi jematan ti mai standard kulinari dunya ke Sarawak ngambi chef kitai ulih mansang, belajar lalu dudi hari ulih ngelui ari nya,” terang iya.
Ku iya agi, dikena ngansah penau enggau nempa pengandal ngagai rebak biak chef Sarawak ti deka ngari ke nengeri enggau menua ba panggau ti besai agi.
Nya kebuah ku Karim, opis menteri iya temegah meri sukung rat ngagai pengawa tu.
“Kami meda BCWC 2026 ukai semina peluang dagang temuai taja endang meri pemaik tang mega nyadi pelasar beguna ungkup pemansang modal mensia ba sektor kulinari enggau hospitaliti ti nipak juluk besai agi Sarawak serimbai Taun Nemuai Ke Malaysia 2026,” terang iya silik.
Kelimpah ari nya, sebengkah pengawa nyain Sempekat Pemereti Ati (MoU) entara MBCSA enggau Blue Point ti ngemata pengawa nyiri Blue Point nyadi kaban korporat Serakup Kulinari Malaysia Begulai Sarawak (MBCSA) sereta penyedia latih rasmi ungkup BCWC 2026.
