KUCHING: Berau by Benak Raya dichalun ba Anugerah Star Golden Heart 2023 nengah program Shell LiveWIRE Malaysia (SLM) Program Anugerah Nasional 2023.

Pemungkal Berau By Benak Raya, Imelda Bragie madah, dagang bepelasarka berau nya dipilih ungkup ngerami bujang berani ti enda dikelala (unsung heroes) Malaysia ti udah meri empas positif ngagai Malaysia nyentuk menua tu diau ba penuduk pemadu manah.

“Aku berasai temegah laban dichalun dalam anugerah tu, nya ngelaika produk ari menua pesisir ulih ngerembai enggau dikelala ba serata dunya.

“Ba taun 2017 suba, Berau by Benak Raya nyadi pengari tunggal ari Borneo.

“Udah nya ba taun 2019 aku ngarika Malaysia ba 10 pengerandang dagang pemadu manah ba tikas antarabansa Anugerah Shell LiveWIRE,” ku iya lebuh ditanya Suara Sarawak, kemari.

Ku anak asal ari Sri Aman tu, iya mai chap berau Iban bepekit ngelaban menua bukai ari 10 buah menua pemadu manah di serata dunya.

“Tabung Ekonomi Gagasan Anak Sarawak (TEGAS) mayuh udah mantu komuniti orang dagang di Sarawak nengah program Shell LiveWIRE ke alai diatu pengawa tu udah dikerembai ngagai komuniti Sabah enggau Semenanjung Malaysia.

“Diatu Berau By Benak Raya udah bulih setipikit ‘halal’ laban aku ngembuan juluk ati deka mai chap dagang tu rembus ngagai menua Brunei enggau menua luar bukai,” ku iya.

Nangkan nya, iya ngarapka komuniti di luar kelebih agi bansa Iban anang takut nguji mansang lalu maju baka bansa bukai ba pengawa dagang.

“Anang ngembuan mayuh penangi lebuh deka bedagang laban kitai di Sarawak bisi penatai ti chukup nyelai ari menua bukai.

“Program Shell LiveWIRE bisi dibuka ninting taun, nya alai aku meransang bansa kitai Iban tauka nembiak rebak masuk program tauka pekit ti meri empas manah dikena ngiri penemu diri,” ku iya.