KUCHING: Kuasa Perintah Sarawak bisi lebas nyendia Skim Pelajar Tinggi Pechuma Sarawak (FTES) ngagai palan pelajar tinggi perintah besai iya nya Universiti Malaysia Sarawak (UNIMAS) enggau Uni-versiti Teknologi MARA (UiTM) Sarawak.Premier Sarawak, Datuk Pat-inggi Tan Sri Abang Johari Tun Openg madah, universiti enggi Perintah Sarawak di baruh bidang kuasa penuh nengeri tu tang UNIMAS enggau UiTM nya insti-tusyen perintah besai ti nitih ke polisi enggau atur ari Perintah Besai.

“Bisi ti betanya baka ni enggau UNIMAS sereta UiTM ba Sarawak sekali ke nerima Skim Pelajar Tinggi Pechuma Sarawak? Dua universiti tu kitai enda ulih masuk champur.

“Kebuah pia laban dua univer-siti ti di baruh Perintah Besai. Enti kitai masuk champur, nangi ke nya enda seraris enggau polisi ba Semenanjung,”ku iya nyemetak.

Abang Johari nibar jaku nya ba Pengerami Anugerah Khas Premier Sarawak (AKPS) 2025 di Balai May-uhguna Kompleks Satria Pertiwi, ditu ensanus.Ku iya, struktur atur pengawa nyengkaum senat enggau atur univer-siti per-intah besai ngujungka Perintah Sarawak tusah masuk champur.

Taja pia, ku iya, Perintah Sarawak tetap nyendia bantu ngagai nembiak Sarawak ba palan pelajar tinggi nya.

“Ti ulih diberi aku (Sarawak) iya nya belanja (bantu belanja khas) ngagai nembiak nengeri ti nampung pelajar ba palan pelajar tinggi (IPT) ba selampur Malaysia ke alai tetiap nembiak nerima RM1,200,” ku iya.

Ku Abang Johari, Perintah Sarawak mega nyendia belanja nga-gai nembiak ti nampung pelajar post-graduate ba bidang perubat berindik ari peminta nambah penyampau lutur ba nengeri tu.Pia mega, ku iya, pengawa nya dikerembai ngagai bidang pekara wang enggau program baru bekaul industri dudi hari.

“Sarawak diatu meri perati ngagai bidang baka dagang karbon, pekara wang korporat enggau model bank baru ti begunaka raban profesional.

“Enti kitai mansang nuju ekonomi gadung enggau ekonomi baru seikas menua maju, kitai begunaka pen-gereja landik ti ulih nyaup ngatur ekonomi nengeri,” terang iya baru.

Nambah ke nya, iya meri terima kasih ngagai bala pengajar ti ny-ukung inisiatif perintah negap polisi ngena dua jaku ba sistem pelajar nengeri.Ku iya, latih pengajar beguna amat kelebih agi nguasa chara ngajar Jaku English ti semampai ngerembai.

Kelimpah ari nya, iya nerang ke peminta ngetan sistem nisih nembiak nyengkaum kerejasama Sarawak enggau Universiti Cambridge ngambi bejalaika peresa nisih nembiak Pri-mari Enam, Pom Tiga enggau Pom Lima.“Aku ukai enda pechaya ke sistem ke bisi diatu tang enti nadai peresa, kitai enda nemu tikas pemintar nem-biak.

“Nembiak ti belajar nadai peresa ulih ngasuh sida enda landik ngarang tauka nyaut tanya enggau betul,” ku iya mantangka penemu.

Ba pengerami nya, perais kategori Anugerah Premier Sarawak Ke-32 mega diberi ngagai sekula enggau individu ti nyulut.

Penerima kategori sekula iya nya Sekula Sekondari (SMK) (A) Sheikh Haji Othman Abdul Wahab, Padawan enggau Sekula Primari (SK) Bandar Limbang seraya ungkup kategori tuai, anugerah disua ngagai Tan Kok Aun ari SMK Rosli Dhoby, Sibu sereta Sahat Yakup ari SK Dato Traoh Muara Tuang, Samarahan.

Ba kategori pengajar, anugerah pengajar mengeri diberi ngagai Yew Ko Woo, SMK Methodist, Sibu seraya kategori menua pesisir tauka menua ulih diterima Chung Sze Meang ari SMK Lake, Bau.

Ungkup kategori nembiak nyulut, penerima SPM diberi ngagai Hannah Toh Hong Na ari SMK Tung Hua, Sibu; SPM Penan diterima Maishela Uanisha Umi ari SMK Temenggong Datuk Lawai Jau, Baram; STPM dipenggi Kong Wei Hang ari SMK Sungai Merah, Sibu; enggau STPM Penan diempu Fioba Mia James ari SMK Marudi, Baram.

Kategori pegawai nyulut Opis Pelajar Nengeri tauka Opis Pelajar Pelilih diberi ngagai Magdaline Jon ari Opis Pelajar Pelilih Dalat.Seraya, kategori PIBG pemadu manah diempu SMK Agama Miri. – SITI NURAIN RATANI