JAKARTA: Pulau Borneo bisi pengulih nyadi kuasa ekonomi baru ASEAN enti kerejasama strategik entara menua ba kandang menua nya ditegap.
Premier Sarawak, Datuk Patinggi Tan Sri Abang Johari Tun Openg madah, pengulih nya kelebih agi ba sektor kuasa gadung, semikonduktor enggau ekonomi digital.
Ku iya, pulau Borneo ti datai ari tiga menua ASEAN iya nya Indonesia (Kalimantan), Malaysia (Sarawak) enggau Brunei Darussalam endang ulih bekerejasama ba siti langkar kolaborasyen.
“Kerejasama tiga menua nya dikeandal ulih nyaup enggau ngerumban pemansang ASEAN lalu udah nya entara ASEAN enggau rayat menua luar.
“Ba pekara tu, Malaysia lebuh nyadi Chairman ASEAN udah ngaku pengulih kuasa enggau Pulau Borneo, kelebih agi Sarawak ulih ngemansangka kuasa ulih dikena baru tauka kuasa gadung.
“Tu nyendia kuasa beguna dikena napi ubah klimet ti benung nyadi maya tu.
“Ari nya, aku ngasai kitai ulih bekerejasama meri bekal ari laluh kuasa ti ulih dikunsi kitai enggau menua ASEAN,” ku iya.
Abang Johari nibar ke pekara nya ba aum media pengudah bekunsi penemu ba Indonesia Economic Summit (IES) 2026 ditu, kemari.
Iya madah, Sarawak diatu meri bekal kuasa karan ngagai Kalimantan Barat lalu nengah Sarawak Energy ti bela meranak puku 25 peratus ba projek hidro di Kalimantan Utara.
“Kelimpah ari nya, Sarawak udah meri bekal 100 megawatt (MW) karan ngagai Sabah enggau ulih nambah kapasiti dudi hari. “Ujung taun tauka suku keterubah 2027, kitai mega deka meri bekal kuasa ngagai Brunei.
Udah nya kitai deka meri bekal kuasa nengah kabel dalam tasik ke Semenanjung Malaysia enggau mega Singapore,” terang iya.
Abang Johari nyemetak madah, pengawa nya deka nyadi pemun matak pengawa meranak puku ari luar.
Ba konteks kerejasama serantau ku iya, pemisi langkar kerejasama perintah enggau perintah (G2G) entara Sarawak enggau Kalimantan sereta pelasar BIMP-EAGA deka negap kerejasama ekonomi meraka menua.
Iya mega madah, pemansang Sarawak ba sektor semikonduktor rebak baru nengah SMD enggau palan pansik di Cardiff, United Kingdom, nyengkaum pemansang chip ngena kuasa AI ti diatu nganti pemendar hak reta intelek (IP).
“Chip nya bisi pengulih diguna ba sektor nyaga pengerai, automatif enggau aeroangkasa.
“Nya alai kitai berati ke aeroangkasa enggau universiti kitai ke nanggam kerejasama enggau Istanbul Technical College, Turkiye.
“Ari kerejasama tu, kitai mega ulih bekerejasama enggau menua sepiak kitai ba bidang semikonduktor,” ku iya baru.
Sama datai, Sekretari Perintah Sarawak, Datuk Amar Mohamad Abu Bakar Marzuki; Sapit Sekretari Perintah Sarawak (Perambu Ekonomi enggau Pemansang), Datuk Sri Dr. Muhammad Abdullah Zaidel enggau bala bukai. -EDISI UKAS
