KUCHING: Status Borneonisasi orang gawa Perintah Besai di Sabah enggau Sarawak diatu bela nyapai 71.88 peratus (Sabah) enggau 87.50 peratus (Sarawak).

Menteri ba Opis Menteri Besai (Sabah enggau Sarawak), Datuk Ts. Mustapha Sakmud madah, penyulut nya ngayanka pemujur agenda Borneonisasi dikena negap peranak lokal diambi gawa.

Ku iya, sida nya mereti ke agi sada peminta enggau peneka rayat sereta utai diguna peranak menua.

“Pengawa tu beguna endar ukai semina ari sukut pemansang kapasiti orang gawa Perintah Besai di Sabah enggau Sarawak, tang mega nempa pengandal, kaul enggau mereti ke budaya ba servis perintah,” ku iya.

Mustapha madah munyi nya serimbai Jaku Tangkan Begulai Enggau Tuai Opis enggau Ejensi Perintah Besai di Sarawak di Begunan Sultan Iskandar, ditu, kemari.

Taja pia ku iya, nadai penyampau peratus ditetap ba agenda nya, tang majak ngayanka penyulut.

“Nadai peratus spesifik.

Pemadu beguna, kitai terus nambahka agenda Borneonisasi tu,” ku iya.

Berebak enggau nya, Mustapha madah ke orang gawa Perintah Besai di Sabah enggau Sarawak mega patut berani nangkup peminta ba servis nengeri bukai, nyengkaum di Putrajaya.

“Budaya kereja ba endur bukai tau dipelajar lalu dibai pulai ke nengeri diri empu ngambi ulih negap perambu enggau pejalai pemansang,” ku iya.

Iya nyemetak madah, tikas pemujur agenda nya ulih dipeda ari orang gawa perintah majak nambah ari peranak Sabah enggau Sarawak ti diambi gawa ba ejensi Perintah Besai ba kededua nengeri. — NICK FLETCHER