Brangka bedagang asil penemu 17 taun diau di New Zealand

KUCHING: Peneleba diau ba menua New Zealand lebih 17 taun sereta ngembuan sebuah kandang chapi ngasuh Brangka Munan ngaul diri dalam dagang produk ai tusu enggau sabun ari tusu bedus.

Iya mega ngembuan degree dalam bidang betanam betupi lebuh sekula di New Zealand ba taun 1985.
“Kira 17 taun udah diau ba New Zealand, aku mega bisi sebuah kandang chapi din.

“Ba taun 2013 kami sebilik pulai ke Sarawak, ti ngujungka aku deka muka dagang ti pemadu jarang dikereja orang ditu,” ku iya lebuh ditanya pemberita maya ngulu Program Agro Bazar Online (ABO) ti dipejalaika Kaunsil Makit Betanam Betupi Perintah Besai (Fama) apin lama.

Ku Brangka, ketegal penanggul belanja dia iya bepun numbuhka dagang bedus laban dagang ngaga produk tusu chukup mar sereta enda muntang digaga.

“Diatu produk tusu ‘Farm Fresh Goats Milk’ udah dijual ba 18 buah kedai ba mengeri Kuching.

Brangka Munan.

“Makit tusu bedus ba Sarawak chukup manah tang laban tu dagang ti agi baru, aku napi penanggul besemekih enggau industri besai baka Fonterra enggau Dumex.

“Ba kedai mayuh amai produk tusu bukai ti diimport ari menua luar ti jauh lebih murah, nya sebagi ari pemar ti ditapi aku,” ku iya.

Tandu iya, mensia mayuh mega enda entu nemu bida tusu chapi enggau tusu bedus.

“Sida semina nemu tusu aja tang sida enda nemu tusu bedus mayuh agi pengelebih ngagai pengerai.

“Kelimpah ngeluarka tusu bedus, aku mega bejual sabun tusu bedus, ‘cheese’ enggau bedus idup.

“Sama enggau pemar nyual tusu, dagin bedus mega tusah deka dijual ditu laban mayuh dagin bedus ti diimport ke alai rega dagin bedus ti diimport lebih murah,” ku iya.

Nya alai enggau pengawa nyereta ABO iya ngarapka dagang tusu bedus tu terus masang sereta dikelala mensia mayuh.

“Laban ti baru nyereta ABO aku bisi pengandal ati ulih nyual produk dagang aku ba kedai ABO.

“Pia mega, aku ngarapka dagang nyual bedus idup tu terus ngerembai laban aku deka ngemesaika dandang bedus ti bisi diatu.

“Sebedau tu, aku jarang ngelakuka produk dagang ba online, nyangka udah tu aku deka chakah agi bedagang ke produk ngena pelasar nya,” ku iya.

Tandu iya, dagang tusu bedus ti dipejalai lima taun ti udah lalu tu dikearap ulih ngerandang jalai endur muka dagang tusu chapi.