MIRI: Menteri Muda Dagang Temuai, Datuk Sebastian Ting madah, jam operasyen Bank Simpanan Nasional (BSN) patut dilanjar ngagai pukul 6 lemai berindik ari mayuh orang berintai panjai ngambi duit Bantuan Prihatin Nasional (BPN).
Iya ngarapka Bank Negara ulih ngemendarka jam operasyen BSN berengkah ari pukul 10 pagi ngagai 3 lemai, dilanjar ngagai 6 lemai.
Sebastian mansutka jaku nya lebuh matau mensia mayuh ba BSN di Waterfront Commercial Centre ditu, tadi.
“Diatu, orang ti bebaris panjai ngambi duit ba BSN enggau utai tu nyadi ba semua kandang menua di Sarawak.
“Kelebih agi maya bulan Ramadan tu ke alai semua orang begunaka duit, nya kebuah aku minta jam operasyen tu dilanjar ngagai pukul 6 lemai ngambi meri peluang ngagai peranak,” ku iya.
Terang iya, iya udah madahka pekara nya ngagai Komiti Penyangga Penusah Ngenyit Nengeri (JPBN) ngambi perambu nya ulih dikenatai ngagai Bank Negara.
“Pekara tu mega ulih nyelaihka sida ti udah bebaris ari pukul 6 pagi asa laban pulai baru lebuh BSN tutup pukul 3 lemai.
“Udah nya, sida datai baru hari siti ngambi bebaris nganti gintir diri ngambi duit lalu kitai enggaika pekara tu nyadi,” tandu iya.
Lebuh ngabas BSN ba pasar nya kemari, bisi sekeda udah datai tumu pukul 6 pagi laban enggai lama nganti.
