BUNGAI Jarau iya nya pesaka seni ti nyadi budaya etnik Iban di Sarawak ti digaga ari batang kayu purang iya nya sebansa kayu lemi ti nyamai diraut.

Seni ti ngemegah etnik Iban nya diturun ari aki ini kitai kelia lalu dibasa enggau nyadi perengka ngias sekali ke nya ba rumah tauka opis perintah.

Pekara nya mujur ngetan pesaka seni etnik nya ngambi majak dikelala rebak biak nyentuk sehari tu.

Enti suba, Bungai Jarau nyadi perengka komunikasyen dikena ngenatai pesan ngagai peranak rumah panjai.

Nya dikena minta bantu bantu ari peranak rumah panjai bukai tauka dikena madah ke siti berita lengkas.

Tuai Rumah (TR) Sijah Ejut, 51, ti mega pengempu Sibu Craft Legacy di Sibu madah, Bungai Jarau mayuh guna.

“Bungai Jarau endang sinonim enggau etnik Iban lalu enti suba, bungai nya suah dikena rambau Gawai Sandau Hari, Gawai Antu Pala tauka pengerami melah pinang,” ku iya.

Bungai nya diraut mipis tauka tebal bepanggai ba peminta sida ti begunaka bungai nya.

Diatu, guna pesaka seni nya berubah ari tuju asal sereta suah nyadi perengka ngias ba rumah panjai serimbai pengerami Gawai Dayak. – ZS