KUCHING: Sarawak ulih bejalaika aktiviti Nangkap, Ngena enggau Nyimpan Karbon (CCUS) nitihka standard pengelikun enggau rampa menua pemadu tinggi enggau Kaunsil Pengeraja Asal enggau Rampa Menua (NREB) nyadi raban bekuasa ti bejalaika pengawa matau.
Ku Kaban Kunsil Nengeri (ADUN) Satok, Datuk Ibrahim Baki, inisiatif tu deka nentuka Sarawak negapka penuduk nyadi bakih global ti ulih dipechaya ngambi nyukung inisiatif klimet dunya seraya matak pengawa beranakka puku dalam teknologi gadung.
“CCUS nya inisiatif besai ngurang ke bekau karbon kitai. Pengelebih pengeraja asal enggau pemansut dikembuan Sarawak ngangkat ke kitai nyadi pemungkal dalam teknologi tu.
“Nengah pengulih tu ukai semina ngurang ke bekau karbon tang mega meri peluang ekonomi nengah dagang karbon,” ku iya.
Ibrahim mansutka jaku nya ba jurai Rang Undang-Undang (RUU) Sumber Asli dan Alam Sekitar, 2024 ba Aum Kunsil Nengeri (DUN) Sarawak, ditu kemari.
Ngenang silik, ku iya, Sarawak mega bisi pengulih nyadi pemekuh besai dalam industri CCUS lalu bisi anggar kapasiti nyimpan karbon penyampau 30 trilion meter padu dalam tasik di pantar benua nya.
“Nengah penuduk kitai ba luar Lingkaran Api Pasifik sereta bisi bekau telaga minyak deka nentuka kitai nyadi pemekuh besai dalam CCUS,” ku iya nyemetak.
Iya madah baru, pelin matau ti tegap beguna endar ngambi Sarawak mansang dalam industri CCUS.
“Nya kebuah, nengah RUU tu, NREB deka diberi kuasa nyendiaka atur malin bekaul ngintu rampa menua maya bejalaika aktiviti CCUS.
“Tu mega matau guna rampa menua ungkup aktiviti lisin karbon kampung,” terang iya baru.- ZARINA ABDULLAH
