SEMATAN: Sarawak deka bepadan enggau kontinjen besai ba misyen ngetanka gelar champion ba Lumba Malaysia (SUKMA) Ke-22 Selangor 2026.
Sapit Menteri Nembiak, Lumba enggau Pemansang Orang Dagang Sarawak (Nembiak enggau Lumba), Datuk Gerald Rentap Jabu madah, bisi 1,158 atlit, jurulatih, menijar enggau pegawai deka mai nama Sarawak ba kimpin sekali tu ti diatur ari 15 nyentuk 24 Ogos tu
. “Penyampau tubuh penyereta ti mayuh tu mandangka pengeran Sarawak nentuka atlit nyulut ba lumba pemadu besai menua tu,” ku iya.
Rentap nyebut jaku nya ba Pengawa Nutup Champion Camp enggau Ngelanchar Countdown 100 Days to SUKMA XXII Selangor 2026 di Kem Putra Sentosa Retreat, Hari Tiga tu tadi. Pengawa nutup nya dipenyadi Menteri Nembiak, Lumba enggau Pemansang Orang Dagang Sarawak, Datuk Seri Abdul Karim Rahman Hamzah.
Nambah ke nya, Rentap madah ke Champion Camp ti dipejalai ba dua renggat mujur ngempuru beratus atlit ari bemacham lumba dikena negap penyulut kontinjen nengeri.
Iya mega madah, Champion Camp ukai semina program latih aja tang mega pelasar nempa atlit ti ukai semina nyulut ba lumba tang mega bisi integriti enggau disiplin ngena konsep semangat ‘Agi Idup Agi Ngelaban’.
Rentap mega madah, timpuh 100 hari nya peluang ngansah penau ungkup semua kontinjen Sarawak dikena nusun strategi, nambah penyulut enggau pengawa nentuka sida nempa pemujur pemadu manah ila.
“Besai pengandal kitai deka ke kontinjen Sarawak ulih nempa pemujur sereta mai semangat enggau ngemegah nengeri ba panggau SUKMA XXII Selangor 2026 ila.
“Pemujur ba SUKMA XXI Sarawak 2024 nunjukka atlit Sarawak ngembuan penau, disiplin enggau pengeransing besemekih ba renggat pemadu tinggi,” terang iya. – EDISI UKAS
