Cherita Bujang Berani ari Lundu, Lans Koperal Bajau anak Ladi

Cherita raban Bujang Berani menua ke kala gawa berambunka nyawa nyadi Soldadu Renjer ketegal ngetanka menua rambau Malaya agi sigau benung disidi dua iku pemansik ari Universiti Malaysia Sarawak iya nya Profesor Madya Dr Neilson Ilan Mersat enggau Dr Regina Garai.

Nitih penerang ari Presiden Gerempung Veteran Soldadu Kor Renjer (PVTKR) Lt Kol (B) Mohd Melintang Abdullah, kisah raban ex-soldadu menua tu endang patut disidi sereta dibantai ngambi ditemu nembiak rebak baru. Nya alai, sida sebuat udah mupuk bejalaika siti projek ke chukup manah iya nya nguji ngumpul semua cherita raban soldadu kelia ngambika ulih dichelak dalam bup Sarawak Renjer.

Serak tu Suara Sarawak, bekunsika kisah ke ditusui Lans Koperal (B) Bajau anak Ladi ngagai Dr Neilson enggau Dr Regina bekenangka sebagi ari penyadi ke ditapi sida rambau betempur enggau munsuh ba Kampung Galau Ulu Kinta, Ipoh di Perak kena 13 Jun 1971.

Taja penyadi tu semak 50 taun udah nyadi tang agi meruan dikeingatka Bajau baka ni siku ketuai sida iya, iya nya Kapten Mohana Chandran A/L Velayuhan rebah ba mua mata Bajau pengudah sigi peluru diselabuka munsuh kena pala tudah Mohana.

Bajau empu kebendar asal ari Lundu, masuk Rejimen Renjer kena 26 Julai 1966 nyentuk 26 Julai 1976. Bekau ari pemujur enggau pemerani ke udah betempur enggau munsuh maya nya, dia Bajau diberi basa nerima midul Panglima Gagah Berani (PGB).

MERUAN REGAS…Lans Koperal (B) Bajau anak Ladi (tiga kanan) maya dirandau ba rumah iya di Kpg Sebemban, Lundu. Bela dipeda (ari kiba) Dr Regina, Melintang enggau Dr Neilson.

Ku Bajau tuju sida masuk soldadu endang nadai tuju bukai sigi ungkup beperang lalu pengawa nya sigi enda ulih diseliah. Dua agi bakih ke sama gawa dalam soldadu maya nya, Renjer Ali enggau Koperal Rahman mega agi dikeingatka Bajau.

“Kena pagi 13 Jun 1971 kami sepelatun betubuh 15 iku diasuh matau kandang menua Kampung Galau Ulu Kinta. Lebuh matau palan nya dia kami bisi tepedaka bekau jalai munsuh. Ari perati bekau kaki munsuh dia kami meragam bala munsuh sigi bisi semak nya.

“Ketuai kami, iya nya Kapten Mohana Chandran terus ngaga panggil ngena radio ngenataika ripot ngagai Pegawai Pemerintah Batalion” ku Bajau.

Udah nya, sebedau ngepunka pengawa matau dia kami dibagi ngagai tiga raban mit iya nya Raban Keterubah, betuaika Kapten Mohana Chandran lalu soldadu ti nitihka iya, iya nya Renjer Abang Bolhi, Renjer Bajau, Renjer Ali enggau Koperal Rahman.

Raban Kedua betubuh lima betuaika Leftnenan Muda Donald Patrick John. Udah nya, Raban Ketiga mega betubuh lima betuaika Koperal Musa.

Udah kami bela bepechah nitihka raban diri empu. Jam kami berangkat urung pukul 2.00 lemai nuju siti bukit ke dipelaba alai munsuh belalai. Tang penatai sida udah dulu ditemu munsuh ti beratika guyap sida. Nya alai, pengudah munsuh bisi tepedaka sida, dia sida terus ditimbak.

“Ninga letup senapang dia kami terus ngerayap lalu nguji malas serang. Munyi letup senapang munsuh nadai alah kira tak nadai nemu putus. Maya ti benung bebalas timbak lebih kurang setengah jam nya dia sigi peluru inggap ba pala Kapten Mohana ngujungka iya tumbang sereta bebadi nyawa.

Meda penyadi nya, dia ati Bajau terus kudi, enda chechamang iya matak senapang Light Machine Gun (LMG) ari Renjer Ali lalu terus ditimbakka nuju bala munsuh. Maya nya, semangat beperang “Agi Idup Agi Ngelaban” ba Bajau benung angat.

Laban ti agi ransi, dia Lans Koperal Bajau anak Ladi deka terus nganjak ke mua tang lebuh baru deka nyingkang ke mua dia sigi peluru inggap ba pah sepiak kiba iya.

Lans Koperal Bajau ke benung ngetatka pemedis bekau kena timbak nya ngaga pemutus belalai dulu. Maya nya, bala munsuh agi terus nimbakka senapang nuju sida Bajau.

Sida terus bebalas nimbak pangan diri. Urung setengah jam betimbak dia endur nya pan tenai. Lebuh munyi timbak udah abis enda mukai-mukai Renjer Ali manjung munyi tu “B Company Covering Fire, C Company Assault”.

“Nya kebendar strategi dikena ngenakutka raban munsuh. Berebak enggau nya mega, sida terus nimbak nuju palan munsuh. Munsuh didinga betekerus ngelarika diri laban nangi ngumbai munsuh ke dilaban ke dilaban sida agi tubah mayuh.

“Bajau enggau dua agi bakih iya, Ali enggau Rahman badu agi nganjak ke mua tang terus ngenduh ba endur diri enda jauh ari bangkai ketuai sida Kapten Mohana.

Sida agi nangi munsuh datai baru ngiga sida laban penyampau sida udah jauh mimit ari penyampau munsuh ke endang bisi kem ba atas bukit nya.

Udah nya, sida terus ngaga panggil minta sah Kompeni A tang sida diasuh besabar dulu nganti penatai orang ti ngesah.

Maya nya bakal ke diasaika Bajau ketegal kena timbak munsuh nyau majak pedis. Urung pukul 8.30 malam sida sebuat bekejang ari palan kena serang nya lalu mupuk bejalai ngiga orang ke ulih mantu.
Kelimpah ari tudah niang Mohana ke udah nadai, sida mega dipadahka Renjer Bolhi pan nadai temu kini penunga.

Sida tiga neruska pejalai semalam-malam nya nyentuk hari siti baru sida betemu enggau raban Kompeni B urung pukul 8.30 pagi pagi. Bajau terus ditabanka berubat ba Sepital Ipoh ngena bilun engkabang.

Bangkai Mohana diambi pulai ari palan endur iya kena timbak ba hari ketiga. Pia mega tudah Renjer Abang Bolhi mujur ditemu tang pendiau balat lemi sereta ikak. Iya terus dibai ngagai sepital ngambika diperubat. Bekau ari penyadi nya, Lans Koperal (B) diberi puji basa ke chukup besai iya nya nerima anugerah midul PGB.

Suara Sarawak