SIBU: Sebengkah rambai jaku bisi madah ‘dini bisi pengeransing, dia meh bisi jalai’ semampai dipegai siku dara bajik benama Clarissa Rinya Setian.
Pengudah enam kali nguji ngeruh ai masuk pekit Kumang, Clarissa, 20, pen mujur menggi gelar Kumang.
Sekali tu, iya mujur narit ati bala akim lalu dipadu nyadi Kumang Karnival Main Asal Durin 2024 ti diatur ba Tebing Pasar Durin kena malam Hari Minggu tu tadi.
Berebak enggau nya, dara bebansa Iban ti datai ari Rumah Mary, Sungai Bidut nya mujur mai pulai perais mata duit sepenyampau RM5,000, jumpang, selampai, bungai enggau setipikit.
Pekit sebaka ti keterubah dipasuk Clarissa iya nya Kumang Pengerami Main Asal Dayak Borneo 2022 sereta bulih penuduk ketiga tauka menggi gelar Selinggar Matahari.
Udah nya, iya ti masang juluk deka nyadi siku pengajar enda masau peluang meri lalau ngagai bala peminat pekit Kumang.
“Lalau aku, pajakka pengawa kita ti deka nyapai juluk diri lalu anang jampat mantul ngapa.
“Alah tauka menang nya endang sebagi ari pekit. Nya alai, anang nyerah alah seagi juluk kita apin dikeamat.
“Ba sebarang pekit Kumang, siku penyereta ukai semina ditentu ari pemanah raras tubuh tang bela ditentu ari sukut pemanah ulah enggau pemintar sida,” ku iya.
Lebuh nama iya dipadu nyadi champion, Clarissa madahka diri berasai gagit enggau temegah nyentuk enda tepansutka leka jaku.
Terang Clarissa, iya enda nyangka diri mujur menggi gelar nya lalu nya ngelai pengiruh enggau pengepuh iya ngelama tu mujur mansutka asil.
“Aku beterima kasih laban ba malam berega tu aku ngempu gelar Kumang Karnival Main Asal Durin 2024,” ku iya.
Ngelansa senentang perambu perais mata duit ti diterima iya, Clarissa madahka duit nya deka disimpan iya dikena nampung pelajar diri ngagai universiti seraya diatu iya benung nganti pemutus peresa Sijil Tinggi Pelajaran Malaysia (STPM).
Nangkan nya, penuduk kedua ba pekit nya dipenggi siku dara penakan Iban-China-Filipina, Tiffany Tc, 22 ti datai ari pelilih Sibu.
Berebak enggau nya, iya mujur mai pulai perais mata duit sepenyampau RM3,000 sereta jumpang, trofi, selampai, bungai enggau setipikit.
Penuduk ketiga dipenggi dara Iban ti datai ari Betong, Easter Jawai paul, 27, lalu mai pulai perais mata duit sepenyampau RM1,500, trofi, jumpang, selampai, bungai enggau setipikit.
Ungkup penerang, tujuh finalis pekit nya nyengkaum Audrey Amara Bachok, 23, datai ari Kuching, Astina Anabella Augustine, 21, (Song), Vanessa Grace Tali, 19, (Kanowit), Floveena Debra Ningkan, 23, (Betong), Nicolyn Kimberly Raymond, 17, (Sibu), Ranisha Ismail, 21, (Sibu) enggau Diyamirza Nantai David, 22, (Kanowit).
