DALAT: Pelilih Dalat majak nyulut ba pemutus Sijil Pelajaran Malaysia (SPM) lebuh Gred Pukulrata Pelilih (GPD) nurun ari 5.20 ngagai 4.87 ba pemutus 2025 lalu nempa pemujur pemadu manah kenyau ari taun 2019.
Nitih penerang, peratus pas kategori Ulih Bulih Setipikit (LMS) di Dalat nambah ari 96.20 ngagai 98.43 peratus mandangka penemban pengawa negap pemujur akademik ba pelilih nya.
Pemujur nya asil pengeransing bala pengajar enggau nembiak sereta sukung rat komuniti nentuka kualiti pelajar terus dikemanah.
Ba pekara sama, Sekula Sekondari (SMK) Dalat nurai pemujur pengudah nempa siku nembiak nyulut ti bulih semua A nengah pemutus 6A+ enggau 2A.
Nangkan nya, dua sekula iya nya SMK Agama Igan enggau SMK Batang Igan mujur bulih 100 peratus LMS, lalu SMK Dalat enggau SMK Oya mega nyulut.
Pemujur nya mandangka penemban mayuh inisiatif pelajar ti dipejalai ba renggat sekula enggau pelilih dikena nambah penyulut nembiak.
Berebak enggau nya, inisiatif deka ditampung nentuka pemujur tu mengkang diasai ba Pelilih Dalat dudi hari.
Nya nyengkaum Program Tuisyen nengah Komiti Pemansang enggau Pengelikun Genturung Pendiau (JKKK) patut ditampung nentuka pemujur tu mengkang ditan.
Nya alai, kerejasama rat entara raban sekula, komuniti sereta ejensi bekaul dikeandal ulih negap pemujur akademik nembiak ba Pelilih Dalat dudi hari.
