KUCHING: Pemujur Opis Parit enggau Entali Ai (DID) Sarawak bulih setipikit Sistem Atur Kualiti (QMS) ISO 9001:2015 enggau Sistem Atur Benchi Dadah (ABMS) ISO 37001:2016 negap penuduk opis nya nyadi pengemudi integriti sereta pemujur ba pemansang nengeri.
Sapit Premier Sarawak, Datuk Amar Dr. Sim Kui Hian madah, pengawa ngaku nya nunjukka penau DID negap atur bekaul servis hidrologi, atur data, injiniring, pejalai projek sereta pemansut ai berurun enggau bisi integriti.
Ku iya, taja pemujur nya patut dikemegah tang tetap deka ke staf opis ngesan pangku pengawa enggau integriti, profesionalisma enggau akauntabiliti.
“Setipikit nya ukai semina ngaku tang mega meseti dibantai nengah servis ti lurus enggau bisi etika ngagai rayat,” ku iya ba Pengerami Ngintu Hari Integriti DID Sarawak, ditu kemari.
Iya mega meri terima kasih ngagai semua staf DID ke pengeransing sida gawa lalu deka ke budaya integriti terus ditegap ba genap renggat servis perintah.
Ku iya, nyadi opis teknikal nengah Arahan Perbendaharaan (AP) 182, genap atur bejalaika projek meseti dipejalai lurus, asi sereta ngasi ke atur malin ditetap.
“Atur pengawa ti manah ukai semina nambah pemujur tang mega nagang penyalah sereta negap pengandal rayat ngagai servis perintah,” ku iya.
Ku iya, DID naka ulih negap integriti dikeandal ulih nyungkak pemansang meruan sereta nambah pengadang rayat ngagai administrasyen nengeri.
