KUCHING: Agenda ngena digital dipejalaika Perintah Sarawak diatu nyau mansutka asil lebuh bemacham sektor strategik majak nyulut.
Premier Sarawak, Datuk Patinggi Tan Sri Abang Johari Tun Openg madah, sektor strategik baka pelajar, betanam betupi, pemansang infrastruktur enggau ekonomi nyau nyengala maju asil ari polisi digital nengeri.
Ku iya, ekonomi digital ti dipejalai udah meri peluang ngagai rayat Sarawak mansang, bisi akses besai agi ba pelajar enggau meri rega tambah ngagai pemansut ti bisi ba nengeri tu.
“Ambi ke chunto ba sektor pelajar, inisiatif Kaunsil Ekonomi Digital Sarawak (SDEC) ti bejalaika Rentayan Internet Menua Pesisir (SRBN) ba kelas patut dipuji laban mujur nambah penyulut pelajar nembiak kitai.
“Pia mega ba pemutus pelajar ba siti sekula sekondari di Long San iya nya Sekula Sekondari (SMK) Datuk Temenggong Oyong Lawai Jau nambah lalu nembiak sida diatu nampung pelajar ba Universiti Malaysia Sarawak.
“Sida chukup beterima kasih ke pengawa kitai nengah SRBN ti ngasuh sida bisi akses ke Khan Academy kelebih agi ba Sains, Teknologi, Injiniring enggau Matematik (STEM), mandangka pemujur inisiatif tu,” ku iya.
Abang Johari nibar ke jaku nya ba Pengerami Ngintu Genap Taun Ke-5 SDEC ditu, malam kemari.
Iya madah baru, digitalisasyen mayuh mantu nengeri tu ba pemansang infrastruktur baka ngaga jalai alun beringkat dikena ngelimat belanja ngintu jalai nya.
Ku iya, Opis Kereja Raya (JKR) udah bejalaika simulasyen ngena sistem model penerang jalai alun tauka jalai besai nengah simulasyen komputer, dikena ngiga chara mutar pemadu manah ngaga jalai ba tanah kerapa.
“Nya alai, kitai ngaga jalai beringkat, nyengkaum di Lingga, Kota Samarahan nyentuk Sri Aman, sereta di Baram, Miri, Marudi, Mulu, Long Panai, Long San, Long Lama nyentuk Limbang.
“Semua endur nya bisi tanah ti kelalu lemi, nya kebuah projek jalai beringkat digaga dia dikena ngurangka belanja ngintu.
“Taja ungkus terubah bisi tinggi mimit, tang belanja ngintu timpuh panjai mudah agi lalu struktur jalai entap agi, ke alai tu mih pemujur kitai nengah simulasyen digital ba pemansang jalai alun,” terang iya.
Berebak enggau nya, Abang Johari bisi bekunsi pasal digitalisasyen ba sektor betanam betupi mujur nambah asil utai tanam enggau jelu tupi, ngangkatka Sarawak pegari ba mata dunya nengah pengawa nengkebang chip KETEQ.AI.
Pia mega ku iya, pengawa mansutka kuasa ulih dikena baru nyentuk nyungkak ekonomi nengeri tu dulu sesingkang ari menua benung mansang ti bukai.
Sama datai, Sapit Menteri Utiliti enggau Telekomunikasyen, Datuk Liwan Lagang, Sapit Menteri Pelajar, Inovasyen enggau Pemansang Penau, Datuk Dr Annuar Rapa’ee enggau temuai dipebasa bukai. -EDISI UKAS
