BINTANGOR: Dua iku nembiak bakal ba penusah bebadi jalai alun ke ngaul sebuah motosikal Yamaha Ego Avantiz enggau Perodua Alza di Jalai Kelupu ditu, kemari.
Ba penusah ke nyadi urung pukul 10.45 pagi nya, nembiak ke bakal iya nya deriba motosikal beumur 17 enggau bakih iya ke beumur 20 taun.
Ketua Balai Bomba enggau Penyah Penusah Bintangor, Nicholas Belulin madah, enam iku kaban bomba berumba ngesah palan penusah pengudah nerima kangau emejensi pukul 10.47 pagi.
“Pengudah ba endur nya, kami meda tudah ke bebadi semina bakal lalu udah dianjung ngagai raban paramedik ngambika diperubat.
“Deriba Alza nya agi mengkang ba palan penusah sereta nadai sebarang bakal,” ku iya.
Nangkan nya iya madah, raban Bomba udah meresi palan penusah nya dikena nentuka palan nya selamat ditengah kereban pengangkit bukai.
Nitih penerang, kededua kereban pengangkut nya bela ba siti arung jalai ke sama maya penusah nyadi lebuh sebuah ari kereban pengangkut nya deka bekuing ngagai Jalai Berjaya.
“Taja pia, kebuah silik penusah tu nyadi agi dipansik,” ku iya.