MUKAH: Dua buah motosikal enggau sebuah entukar angus ba penusah ti nuntung sebuah rumah seringkat bansa dampa di Ladang 1 SPB Mukah 1 Jalai Selangau-Mukah malam tadi.
Tuai Polis Pelilih Mukah, Deputi Superintendan Muhamad Rizal Alias madah, penusah nya nyadi urung pukul 7.30 malam.
“Lebuh penusah nya nyadi, sida ti nguan rumah nya nadai dia tang benung diau ba rumah kedua.
“Pengudah ninga ukui enda ngetu nyalak, dia sida nyenguk ari mua empelua lalu tetemu ke api benung nganguska dapur rumah keterubah nya.
“Berebak enggau nya, sida terus ngiga kunchi entukar ti diengkah ba rumah keterubah tang enda mujur laban api jampat ngerekai ngagai mua rumah,” ku iya ba sebengkah penerang tadi.
Rizal madah, sida ti nguan rumah nya ngangauka sida ti sama genturung pendiau dia minta bantu sereta betelefon ngagai 999.
“Raban Balai Bomba enggau Penyah Penusah (BBP) Selangau datai dia urung 20 minit laban takah penyauh endur nya enggau Pasar Selangau urung 30 kilometer.
“Api ti nganguska rumah nya mujur dirara pukul 8.40 malam.
“Ketegal penusah nya, semua dokumen entukar angus lalu dokumen enggau reta tengkira bukai apin ulih dikenuku,” tampung iya.
Terang Rizal, pun penyadi penusah angus nya enggau penyampau pengerugi reta tengkira benung dipansik Raban Forensik Opis Bomba enggau Penyah Penusah Zon Sibu.
