LUNDU: Pelilih Lundu enggau Sematan terus ngasai buah pemansang infrastruktur pemun lebuh dua projek bekal ai empas tinggi beungkus RM256 juta diatu benung dipejalai Perintah Sarawak nengah Opis Menteri Utiliti enggau Telekomunikasyen Sarawak sereta Opis Bekal Ai Menua Pesisir (JBALB) ti nyadi ejensi pengatur.
Menteri Utiliti enggau Telekomunikasyen Sarawak, Datuk Seri Julaihi Narawi bisi datai ngelanchar kededua projek nya ba Kampung Sedaing enggau Kampung Titiakar, Hari Enam tu tadi.
Pengawa ngelanchar nya dikemata Menteri Pemansang Indu, Ruang Bilik enggau Komuniti ti mega Kaban Parlimen Santubong, Datuk Seri Nancy Shukri disempulang Kaban Kunsil Nengeri (ADUN) Opar, Billy Sujang enggau ADUN Tanjong, Datuk Azizul Annuar Pehin Sri Adenan.
Projek keterubah iya nya ngaga Loji Ai Beresi Baru Lundu ti dipejalai nengah tinda tebuka dipelaba beungkus RM112 juta enggau skop projek nyerangkung ngaga tangki ai kapasiti 20 juta liter sehari (MLD), stesyen pintu ai, begunan administrasyen, stor perengka kimia enggau rumah pam.
Projek tu mega nyerangkung masang sambung batang paip sepanjai 1.5 kilometer, sambung paip grid ai beresi sepanjai 4.5 kilometer ke Simpang Biawak, sereta sambung paip sepanjai enam kilometer ari Simpang Biawak ngagai Stesyen Pam Ai Bagak.
Projek ti disadang tembu 2028 deka nambah kapasiti enggau bungkur bekal ai beresi ngambi tetangkupka penguna ti bisi diatu sereta penguna baru ngelingi Lundu enggau Sematan.
Seraya, projek kedua iya nya Projek Bekal Ai Sitak Lundu– Sematan ti dipelaba beungkus RM144 juta mega dipejalai chara tinda nengah skop ngaul pengawa ngaga empat stesyen pam ai ba Telok Melano No.1, Telok Melano No.2, Sematan enggau Opek, sereta ngaga empat tangki ai bela ngembuan kapasiti entara dua juta nyentuk 4.5 juta liter di Telok Melano, Sematan, Sedaing enggau Pasir Ulu.
Bisi mega digaga sambung paip bemacham pemesai sepanjai 77 kilometer, paip ai sepanjai 25 kilometer sereta sambung paip komunikasyen ngagai 1,176 rumah sepanjai 58.8 kilometer.
Projek ti udah belabuh dipejalai kena September 2025 tu disadang tembu suku ketiga taun 2028 lalu nya mega sebagi ari projek sistem grid bekal ai Sarawak. — EDISI UKAS
