KUCHING: Projek ngaga jalai ba Jalai Sebeliau Nanga Entalau enggau Jalai Bukong Bypass ari Engkilili, Kampung Bulu ke Lubok Antu, Sri Aman deka ditinda ba ujung suku kedua taun 2024.
Sapit Menteri Infrastruktur Enggau Pemansang Penyangkai Kapal l Datuk Ir. Aidel Lariwoo madah, dua projek nya udah dikemendarka ungkup Kunsil Nengeri (DUN) Engkilili di baruh Ejensi Pemansang Sri Aman (SADA).
“Skop projek tu ila ngaga jalai baru ba sepemanjai lapan kilometer (KM) di Jalai Sebeliau Nanga Entalau nengah Opis Kereja Raya (JKR).
“Nya mega nyengkaum pengawa nyungkur tanah, sistem parit enggau kereban pemun bukai jalai raya ti dipelaba ngena belanja RM68 juta,” ku iya.
Aidel bejaku munyi nya lebuh nyaut tanya ADUN Engkilili Dr Johnical Rayong Ngipa bekaul perambu projek ti udah dikemendarka ba DUN Engkilili nengah SADA rambau Aum DUN Sarawak Ke-19 di DUN Sarawak ditu, kemari.
Kelimpah ari nya ku iya, skop pengawa bagi projek jalai Bukong Bypass ari Engkilili ngagai Lubok Antu di Sri Aman mega mungkur pengawa ngaga jalai alun sepemanjai tiga kilometer di baruh JKR.
Iya madah, projek tu mega nyengkaum pengawa ngaga sistem parit, kereban pemun jalai raya enggau tiang lampu jalai.
“Projek tu dipelaba ngena ungkus RM39.5 juta,” ku iya.
