KUCHING: Dua rengka dalam Lingai ke dipelaba ditagup baya ba Sungai Mekam Sare, Jaka Sarikei, udah ditemu urung pukul 11 pagi tadi.
Palan Operasyen Bomba Sarawak madah, tudah Lingai Rabong, 78 taun, nurun ngupa apung pukul 7.30 pagi, Hari Empat tu tadi.
“Nitihka penerang ari saksi ti meda baya narit tubuh Lingai ke benung Sungai Mekam.
“Naka kemari, operasyen nyidi enggau nyelamat (SAR) agi dipejalai sepanjai Sungai Mekam kandang 3 km penyauh ari endur PKOB nyentuk lubuk baya,” ku iya meri penerang.
Urung pukul 11 pagi kemari, raban bomba enggau peranak dia udah tetemuka dua rengka dalam enggau kaki kanan tudah ba tebing Sungai Mekam penyauh 1km ari lubuk baya nya.
Rengka dalam tudah Lingai ke udah ditemu iya nya tungkul sengayuh dipeda peranak melepung ba ai.
