▪ TUSUN EMPAT

ENDA berasai, kitai nyau majak rindang ngenang pemansang Rumah Temuai Patrick ti ukai semina dikelala ba selampur menua tang mega suah ditapat bala temuai ari menua luar.

Serak tu, kitai deka ngenang bekaul pemar, empas ekonomi enggau pemeruan dagang temuai.

Ari penyelai budaya nyentuk penyamai manuk pansuh, ukai mai reti pengawa ngemansang rumah temuai ba kandang menua pesisir nadai napi sebarang andau penguji.

Baka dagang komuniti bukai, Rumah Temuai Patrick Libau mega napi pemar lalu nya mega nyadi sebagi ari strategi ekonomi menua ti besai agi munas peny eranta menua pesisir.

“Pemar pemadu besai ti ditapi kami seru mah naka diatu iya nya tali arus penyambung ti agi lubah ditu.

“Ba jeman digital, tali arus penyambung beguna endar dikena berandau enggau temuai, nyaut tanya enggau udar jampat agi sereta ngemaru penerang ba media rama.

“Lebuh tali arus penyambung bisi tejanggal, nya tau ngasuh kami lubah nyaut tanya bala temuai lalu meri empas ngagai chara kami ngelaku pakej rumah temuai ditu,” ku Tuai Rumah Patrick mantaika sebana ati ngari ke sida serumah.

MERI PENAMPAK

Berindik ari nya, Premier Sarawak, Datuk Patinggi Tan Sri Abang Johari Tun Openg kala ngaku kompeni telekomunikasyen ke bisi diatu enggai ngere mbai servis ke menua pesisir Sarawak.

Nya entara kebuah Sarawak merambu ngembuan rentayan telekomunikasyen kediri empu ngrena subsidi perintah ngambi nyedia pakej tali arus penyambung baru ungkup rayat.

Ngeleda ke pemesai guna isu tu, Perintah Sarawak nengah Kaunsil Ekonomi Digital Sarawak (SDEC) ngelancar Inisiatif Rentayan Sambung Menua Pesisir Sarawak (MySRBN) ngrena agih belanja RM200 juta dikena nirika 150 tiang pemanchar menua pesisir.

Udah nya, program MySRBN XL nyambung lebih 8,000 rumah ngrena sambung gentian optik penyeras nyentuk 100 Mbps.

Menteri Utiliti enggau Telekomunikasyen Sarawak, Datuk Seri Julaihi Narawi mega nyemetak madahka akses tali arus menu a pesisir ukai semina perengkaguna tang siti perminta nentuka penarak bulih peluang pelajar enggau ekonomi baka endur bukai.

Iya madahka inisiatif nya nengah selinting nirika 618 tiang pemanchar ba selampur Sarawak lalu disukung agih belanja sepenyampau RM2.3 bilion baka taun 2025 nengah program SALURAN.

Nampung randau, Tuai Rumah Patrick madah ke tetap tiang pemanchar baru enggau ngerembai bungkur MySRBN mai pengadang bekaul sebana pasal tali arus deka diputar lalu sida ulih ngatur udar sereta lanchar agi berandau enggau temuai.

“Kami mega deka sida meruan ingatka penyelai budaya enggau pemarah rampa menua ditu.

“Baka orang ti benung besulu, kami deka sida semampai lelengau enggau gagit deka nemuai kitu.

“Nya ngеnang bekaul hospitaliti, kami naka ulih nentuka bilik semampai beresi enggau kemas sereta semampai ngulihka timbal ngambi nemu nama ti patut diadu manah agi.

“Kebuah pia laban pengawa ngadu manah agi nyadi kunchi nyedia servis bekualiti,” terang iya.

Nambah ke nya, Rumah Temuai Patrick kebendar nyadi sebagi ari strategi ekonomi menua ti besai agi.

INKLUSIVITI

Abang Johari mega kala nyebut ba sebungkah konvensyen agrodagang temuai, dagang temuai bepelasarka komuniti negap peranak menua lebih suda ngambi bagi ba aktiviti dagang temuai.

Ku iya, pengawa nya ukai semina meri pemaik ekonomi tang mega negap sempаi rеti nyaga rampa menua, ekologi enggau budaya nipak Strategi Pemansang Pengudah COVID-19 (PCDS) 2030 ti ngemеrat bungkur rama.

Ukai naka nya aja, Sarawak deka mantaika penyelai menua, budaya enggau daya idup rayat nyadi Soul of Borneo ngalai dunya ari negapka sektor dagang temuai bepuguka pemeruan.

Abang Johari mega madahka kaul rat entara rayat Sarawak enggau rampa menua asal nempa identiti nengeri nya empu.

“Kitai bisi ba dunya tu bisi kaul rat enggau utai ke dikumbai kitai rampa menua asal ke alai budaya kitai empu ngayanka kaul entara mensia enggau dunya.

“Ari kaul tu, kitai idup lantang enggau pupu bansa sereta raban etnik idup nyadi siti ruang bilik. Kitai ukai semina idup lantang dalam pupu bansa aja, tang kitai mega idup lantang enggau rampa menua asal,” ku iya seraya ngayanka pengawa menua enggau budaya Sarawak mega diaku antarabansa nengah empat iku UNESCO iya nya Taman Negara Gunung Mulu, Taman Negara Niah, Kuching nyadi Mengeri Kreatif Gastronomi UNESCO enggau Sarawak Delta Geopark.

Ku iya, aku nya ngenegapka penuduk Sarawak nyadi palan dagang temuai ti nyendiaka mayuh pematak bepelasarka rampa menua asal, budaya, sejarah enggau gastronomi.

“Reti nya, Sarawak ngembuan empat pematak nya, lalu tu mih ke deka dikunsi kitai enggau dunya.

SUKUNG TEGUT

Perintah Sarawak majak negap pemansang sektor dagang temuai, industri kreatif enggau seni pemerindang nengah kerejasama rat enggau Perintah Besai nentuka.

Taun tu, iya madahka MOTAC ngagihka belanja sepenyampau RM3.87 juta dikena bejalaika 16 projek.

Abdul Karim mega madah, PCDS 2030 ti dikemansang Abang Johari nya dikena ngubah rantau tu nyadi palan pematak eko dagang temuai enggau ngeranchak dagang.

Ku iya, strategi nya nyerangkung inisiatif ba enam sektor ekonomi besai lalu dagang temuai berada endar dikena nyungkak pemansang ekonomi nengah inklusivit entu nentuka pemeruan rampa menua.

Iya madah baru, pengawa ngaku Gua Niah nyadi Taba Pesaka Asal UNESCO ngentap penduduk dagang temuai nyadi sebagi ari penyungkup ekonomi lalu mandangka pesaka budaya enggau penyelai rampa menua ba nengeri tu.

Ba penemu Tuai Rumah Patrick, pemujur ekonomi enda ulih dipelara ari tanggungpengawa ngaga rampa menua.

“Kami chukup ngemеrat sukut nyaga rampa menua enggau dagang temuai meruan.

“Kami semampai meransang bala temuai nyaga pemeresi ngelingi rumah temuai tu, ngurangka pengawa ngrena plastik sekali kena sereta muai uras ngagai endur ti udah disedia,” ku iya seraya madahka dagang temuai meruan tu mai rеti nyaga rampa menua, bebasa ke budaya enggau meri pemaik ngagai komuniti.

Kebuah pia laban ku iya, penemu nya senutuk endar enggau visyen kerejasama komuniti ba agro dagang temuai negap rеti nyaga endur ngelingi sereta ekologi.

Ba tusun kepenudi ila, kitai deka ngenang baka ni Rumah Temuai Patrick Libau nyagu diri ngagai dunya sereta sanding penemu enggau visyen Tuai Rumah Patrick ungkup pemansang rumah temuai enggau dagang temuai komuniti di Sarawak.

▪ BETAMPUNG