KUCHING: Bajet Sarawak 2021 nyendiaka pelin strategik mungkur semua pekara sereta nyata bebendar deka ngemujur juluk Sarawak nyadi menua maju bepenatai pemisi tinggi manggai taun 2030.
Menteri Dagang Dalam Menua enggau Pekara Penguna, Datuk Seri Alexander Nanta Linggi madahka ekonomi ti tegap ba renggat nengeri ulih ngenegapka pemanah ekonomi ba renggat nasional.
“Nya kebuah, Sarawak ba pelasar ti betul beranakka puku entarabansa kelimpah meri pengandal ngagai bank menua luar bisi ati dalam pemansang mayuh sektor industri.
“Tu nyengkaum nyerungkai mayuh peluang ekonomi baru ngambi nyukung inisiatif mulaika penegap ekonomi ke pemaik pemansang Sarawak dudi hari,” ku iya meri penerang, ditu kemari.
Nanta ti mega Sekretari Besai Gempung Parti Sarawak (GPS) madahka Bajet Sarawak 2021 nya nyata setipak enggau pekara ke nyadi diatu bekaul penusah beduduk ari pandemik Covid-19.
Ku iya, agih belanja tambah dalam bajet tu nunjukka sistem wang kitai tegap ngambi nyikap diri napi pengerekai enggau gelumbang Covid-19.
