KUCHING: Empat iti jematan besai di Sarawak disadang berengkah ulih ditengah tauka tembu Disember tu nyengkaum Jematan Batang Lupar 2 ti deka ngemuntangka penyauh pejalai Sri Aman enggau Betong ari sejam nyadi urung 25 minit.

Sapit Premier Sarawak, Datuk Amar Douglas Uggah Embas madah, Jematan Batang Paloh, 1.7 kilometer pemanjai dipelabaka ulih ditengah berengkah 30 Oktober lalu ditangkan Jematan Batang Lupar 2, 870 meter pemanjai November tu.

“Jematan Batang Paloh dipelabaka berengkah ditengah 30 Oktober 2026 alai semua penyampau jematan besai ke udah tembu di Sarawak nambah ngagai 13 iti,” ku iya madah.

Iya madah munyi nya maya ngenataika jaku simpul ari opis menteri iya ba Aum Kunsil Nengeri (DUN) Sarawak Ke-19 ditu, Hari Tiga.

Ku iya, Jematan Batang Lupar 2 deka ngurangka penyauh pelajai ari Sri Aman enggau Betong ari 73 kilometer nyadi urung 28 kilometer.

“Enti jematan tu tembu ila, penyauh Sri Aman ngagai Betong deka kurang ari sejam nyadi urung 25 minit aja,” ku iya madah baru.

Menteri Infrastruktur enggau Pemansang Penyangkai Kapal Sarawak nya madah, Jematan Batang Saribas 2, 2.39 kilometer pemanjai di Pusa disadang tembu Disember tu.

Kelimpah ari nya, Jematan Sungai Limbang, 772.4 meter pemanjai di Utara Sarawak bela dipelabaka ulih ditengah bulan nya mega.

Enggau semua nya, 12 ari 22 jematan besai beungkus RM6.55 bilion ke digaga di Sarawak udah berengkah ditengah mensia mayuh kenyau ari November 2024. — EDISI UKAS