Empat kes pemati, 178 kes positif baru di Sarawak

KUCHING: Sarawak sehari tu ngerikodka empat kes pemati ketegal Covid-19 ti ngujungka penyampau orang ke udah bebadi nyawa ketegal penyakit nya nambah ngagai 48 iku.

Komiti Penyangga Penusah Ngenyit Nengeri (JPBN) dalam siti penerang media sehari tu madahka semua sida ke bebadi nyawa nya bela udah lunggar umur.

Ku penerang JPBN, kes pemati ke-45 ngaul siku lelaki ti dipasukka ba Sepital Sibu kena 3 Februari ketegal sendat seput, batuk, tabin enggau idung berai kenyau 28 Januari.

Iya ditemu positif kena 3 Februari sereta kala ngembuan penyakit bukai baka penyakit tungkul sengayuh, darah tinggi, gout enggau dislipidemia.

Nangkan nya kes pemati ke-46 mega siku lelaki, udah nadai kena 4 Februari ke ditemu positif kena 28 Januari tu tadi.

Kes pemati ke-47 ngaul siku lelaki umur 82 taun ti dipasukka berubat ba Sepital Sibu ketegal tabin.
Peresa rT-PCR kena 26 Januari nemu iya positif tang kes mega bisi ngembuan penyakit bukai baka darah tinggi enggau strok.

Kes pemati ti kepenudi ngaul siku lelaki mega umur 79 taun.

Iya dipasukka berubat ba Sepital Sibu laban bisi kontak enggau kes positif Covid-19 ke alai iya ditemu positif kena 3 Februari.

Kes tu mega ngembuan penyakit bukai baka kemi manis, darah tinggi, tungkul sengayuh raya enggau kala kena strok.

Nangkan nya, bisi 178 kes positif baru dirikodka ba Sarawak kemari.

Tu ngujungka penyampau kes positif Covid-19 ba menua nambah 5,272 kes.

Kes tu ditemu ba Sibu ti ngerikodka 67 kes, Bintulu (24), Dalat (23), Kanowit (21), Kapit (10), Miri (6), Song (5), Samarahan (5), Kuching (3), Matu (3), Selangau (2), Sebauh (2), Beluru (2), Sarikei (1), Bau (1), Subis (1), Julau (1) enggau Lawas (1).

Suara Sarawak