BINTANGOR: “Aku baban ati, nyau enda tepansutka leka jaku agi lebuh dipadahka rumah kami angus.”
Nya aja jaku ulih pansut ari mulut Tuai Rumah Dangat Ansi, ke tasah ketegal rumah panjai sida ba Jalai Sing Ba, Sungai Kawi ditu dituntung penusah karam di darat kemari.
Penusah ti nyadi urung pukul 9.20 pagi nya ngujungka 157 peranak dia diatu semina tinggal gari ba punggung.
Ku Tuai Rumah Dangat, lebuh penusah angus nya nyadi, iya agi ba Opis Pelilih Meradong sebedau iya berumban pulai pengudah nerima kangau siku ari sida serumah.
“Lebuh aku datai ba rumah, sebun tebal enggau api benung mau nganguska rumah.
“Maya nya, endang nyau deka setengah ari rumah panjai kami udah abis diempa api.
“Chukup sinu meda bala kami serumah nguji nyelamat reta tengkira diri tang meh nadai daya laban api udah kelalu mau,” ku iya lebuh dirandau Suara Sarawak.
Tuai Rumah Dangat enggau ati sinu madah baru, penusah nya keterubah nuntung rumah panjai sida ti udah manggai lebih 30 taun. Ku iya, semua sida serumah ke tasah diatu diau ngenduh dulu ba rumah kaban belayan diri ke diau semak.
“Semua kami serumah ukai semina lenyau endur diau aja, tang meh puntan nyelamat keresa berega bukai.
“Taja pia, ati bisi lantang mimit laban nadai bala bakal tauka bebadi nyawa ba penusah tu.
Puji Tuhan, seput agi disangkung,” ku iya.
Ku Tuai Rumah Dangat, sida udah madah ngagai Kaban Kunsil Nengeri (Adun) Meradong, Datuk Ding Kuong Hiing ti sama datai ngesah kia kemari, pasal penusah ti nyadi.
Ba lansa sama, Tuai Polis Pelilih Menua Meradong, Deputi Superintendan (DSP) Sekam Anoi madah, sida nerima kangau pasal penusah angus nya pukul 9.30 pagi sebedau siti tim polis dianjung ngagai endur angus.
Penusah nya ngujungka 18 ari 34 pintu bilik ba rumah panjai nya angus lengis seraya 16 pintu da ulih diselamat.
“Polis enggau Bomba datai dia urung pukul 9.35 pagi lalu pengawa ngerara api dikereja raban Bomba sebedau api mujur dirara enda lama udah nya.
“Kami nadai nerima sebarang ripot pasal orang bakal enggau bebadi nyawa.
Ari nya, kami mega muka Palan Kontrol Endur Penusah (PKTK) ngambi matau sereta meri bantu ngagai sida ke tasah,” ku iya.
Sekam nambah, pun penusah nya nyadi agi dipansik lalu rumah panjai 53 peratus rusak.
